East inscription at Zhva'i lha khang

1 / / myI'i rgyal po lhas mzad pa / / ['phrul] gyI lha2btsan po khri / lde srong brtsan gyi / bka[s / / /]3ban de myang tIng nge 'dzin / dbu snyung gtsIgs slad kyis4gnang ba / / ban de ting nge 'dzIn / nga'i chab srid 'don5cing / zho [sha] chen po 'bul 'bul ba / gtsIgs snga ma6g[na]ng ba'I tshe'ang zla dpe dang / / zho sha'I rkyen bzhIn7bka' drIn 'os pa tsam du gnang ba las / ban de nyid8kyis / bka' drIn myI nod par gsol nas / / gtsIgs9ran par dpags pa las kyang phrI zhing smad pa zho10sha'I rkyen tu ma bab ste / bka drin chungs shIng pham bar11gyurd / ban de ting nge 'dzIn kyis / nga'I zha sngar chab srId12gsol nas / nga'I sku ring la / sku dang chab srId la 'phral13yun gnyis su legs pa'I bka' gros gsold cIng14spyir dpen pa'I las chen po byas pa dang / bla 'og phyogs15su bde ba dang / phan ba'I mdo chen po byed byed / / snying16nye nye ste / zho sha cher phul ba / bka' drin gtsIgs17bskyed par / nga'I thugs la dgongs na / ban de ni gtsigs18sngar gnang bas 'tshal te myi bskyed par gsol gyis19kyang zho sha chen po'i lan / bka' drIn myI 'pham bar sbyIn pa'I20rigs par / rje blon mol nas / gtsIgs sngar gnang ba21yang de bzhin gnang ba'I steng du / ban de ting nge 'dzIn snying22nye zhing zho sha chen po phul ba'I phyir / bka' drin 'brug gi lo23phyi ma la / pho brang 'on cang do na bzhugs pa'I tshe / gtsigs24gsar du bskyed de / nga'I bkas gnang ba / / yI ge g.yung drung25sngar gnang ba bas bstod de cher gnang / / blon snang bzang26'dus kong gi bu tsha 'phel rgyud dmangs kyi rnams kyang gtsang27dang stong las stsogs pa sgor bde ba'I rnaMs / zhang lon yI ge28can gyi thang du gnang ba dang / ma nyes par srog srid la dku29dang gnod pa byed zhIg yod na / su la bab kyang rung / dku'30ba dang / phe'u pa'I ngo khar myI dor bar / dku ba du gtogs pa / /31bka gyod la gdags par gnang ba dang / lha rIs su bsngos pa32[l]as cir gyur kyang / bla 'og gzhan gyIs dbang myi bya bar gnang33[ba] las stsogs te / gtsigs snga ma'I steng du / gtsigs phyI ma34[b]snan bskyed de gnang ba rnams kyang / de bzhIn du / nam zhar35[b]rtsan bar gnang ste / nga'I zha snga nas kyang dbu snyung gnang / / jo mo36[m]ched dang / rgyal phran dang / chab srId kyI blon po rnams dang / zhang37[l]on phra mo thams cad kyang brnan te / mnas bsgags nas /38gtsigs bsnan bskyed de [g]nang ba yang yun tu brtan zhIng mngon39bar bya ba'I phyir / mdo' rdo rings la brIs te mtha' phyag rgyas40btab nas / gtsug lag khang dang / gtsIgs kyI mkhar bu'I41drung du bzhag pa yin gyis / / rje blon phyi rabs mnga' mdzad pa42rnaMs kyIs kyang / naM naM zha zhar gtsIgs rnaM gnyis kyI yi ge las43'byung ba dang / rdo rings rnaM gnyIs la brIs pa las myI dbrI myi44bcos myi bsgyur bar gyIs shig / / gtsIgs snga ma'I steng45du phyIs gtsIgs bsnan bskyed de / gnang ba yang / zhib tu nI46gtsIgs kyI yi ge la brIs te / phyag sbal du47bzhag / dpe gcIg gtsigs snga ma dang phyogs48su gtsIgs kyi mkhar bu 'dIr bzhag / dpe49gcIg 'og dper 'chang du bcug go / /