Pelliot tibétain 16 + IOL Tib J 751 (= Ch.9.I.37)

35r1 /:/ thang du gtsigs kyI gtsug<s> lag khang bzhengs par mdo gams kyI khams kyi dbang po rnams kyIs dkon mcog gsum la mcod cIng yon phul ba 'dI'i bsod nams dang / byin gyI rlabs kyis35r2lha btsan po rje blon 'khord dang bcas pa'I sdig pa thams cad nI byang / bsod nams dang ye shes kyI tshogs nI yongsu rdzogs nas chab srId mjal dum g.yung drung du brtan sku tse rIng zhing lha dang myI'i bde skyid35r3phun sum tshogs pa la gnas te / bla na myed pa yang dag par rdzogs pa'I byang cub lhun gyIs grub par smon to / / (vermilion<) / / de ga gtsIgs kyi gtsug lag khang zhal bsro ba'I35r4tshe bde blon gyI smon lam du gsol ba' / / (>vermilion) phyogs bcu mtha' yas mu myed pa na skye ba dang / 'gog pa las rnam par dben ba yod myed dang rtag chad kyI mtha' las 'das pa dus gsum gyI de {bde} bzhin gshegs pa35v1thams cad la mcod cIng bstod nas skyabsu mcIste / gus par phyag 'tsal lo / / 'jIg rten dang 'jIg rten las 'das pa na 'phags pa thams cad mkhyend pa'I ye shes dang ldan ba gag la cI snyed bzhugs so cog35v2dang / chos dang / sangs rgyas dang / dge 'dun la skyabsu mcIste / gus par phyag 'tsal lo / / 'o lde spu rgyal gnam gyI lha las myI'I rjer gshegs pa yong gIs sku bla gnyan / chab srId che / chos bzang / gtsug35v3lag che bas yul byung sa [ngod (/dod)] tshun cad rje'I gdung ma gyurd te / chab srId g.yung drung du brtan zhIng che ba'I bka' drIn chen pos phyogs brgyad du khyab par khebste / phyI nang gnyIs kyi 'greng myI 'o chog la35v4mnyam bar dgongs nas mtho zhing dregs pa nI rlabs dang thabs kyIs btul te rigs pa'I chos la btsud / dma' zhIng rgud pa nI 'phral yun gnyIsu dga' zhIng spro bar gzengs bstod nas gnam mtha' 'og36r1 / / gI 'greng myI 'o chog yun gyI bka' drin gyIs khyab pas / gnam chen po phyogs bzhI'i mnga' bdag / / 'phrul gyI lugs dang 'thun ba nI / bod kyI lha btsan po / 'phrul gyI zha snga nas bzhugs te / / yong yang / chu bo chen po'i36r2glad / gangs rI mthon po'i rtsa / yul mtho sa gtshang ba'I gnas na bzhugs pas / 'phrul gyI lha btshan po ni / / gdung rabs 'grangs par yang / lha'i lugs ma mnyam ste / rgyal po gzhan bas / che zhIng brtsan bar36r3mngon / / de ltar yab myes lha dang stang bas / yong yang / chab srid che / dbu rmog brtsan ba'I steng du / / 'phrul gyI lha btshan po khri gtsug lde brtsan gyi zha snga nas / sku la dbyig36r4'khrungs / thugs la 'phrul mnga' ste / gtsug lag khang thams chad tshul bzhin mdzad pas nI / sku bla rIng rdzI dang / gnam sa'i lha klu / thams chad kyang 'go zhing dgyes / / thugs rje chen po dang ldan bas nI 'greng myI36v1'o chog la / gnam sa'i lugs dang 'thun par / bkab cIng bkur te / chab srid gyi mnga' thang chen po dard cIng rgyas pa'i dus su / chab <kyI> srid kyi blon po yang 'phags pa dag chig / mnga' thang du byung ste / / blon chen po36v2zhang khrI sum rje dang / chen po zhang lha bzang po gnyis kyis / dgra'i shed smad de / chab srid kyI phang [bsdod (/bsngod)] nas / / rgya drug 'jang las stsogs pa mtha'I rgyal po / / bar du chab srid la [sngo (/sdo)] zhing rtsol / ba36v3kun kyang / bka' nan gyI mthu dang / rlabs gyIs / bthul bas nI re thag bcad / yun rIng por legs shIng bde ba'I bka' drin gyis ni dad pa dang spro ba bskyed nas / gnam sa yid 'byor pa dang 'dra bar / rgyal36v4khams du ma zhig gis / / bod rje blon gyI bka' gus par mnyan te / chab srid mjal dum chen po mdzad pa 'dI yang / 'phral yun gnyis su legs shing bde ba nyI tser ma bste / / gzha' gsang gnyis37r1 / / <su mjal dum gyI> su chab srId kyi phang mtho ba dang smos shIng brjod pa'I don kyang rab du zab / lo stong rabs khrir yang 'brI ba myed par bzang zhIng snyan te mjal dum gyI legs pa chen po mngon sum du mdzad37r2pa 'dI dkon mchog gsum dang / 'jig rten gyI lha klu thams cad kyis kyang mkhyend cIng gzigs pas na / nam du yang myI 'gyur zhing brtan bar smond to / / de ltar mjal dum chen po37r3mdzad pa'I rkyen kyis rgyal khams du ma zhig gI 'bangs mchon cha'I khar nyon mongs pa mying myed par brtsald te / bde skyid pa'I gnas la dus gcig du bkod pa'I bsod nams37r4chen po 'dIs / 'phrul gyI lha btsan po khrI gtsug lde brtsan mched dang / chab srid kyI blon po chen po legs pa sgrub sgrub pa blon chen po zhang khrI sum rje dang / zhang chen po lha37v1bzang la stsogs pa bod rje blon 'khord par bcas pa dang / sems can thams cad sgrIb pa rnam gnyis byang nas bsod nams dang ye shes kyI tshogs yongsu rdzogste mthar yang bla na myed pa yang dag37v2par rdzogs pa'I byang cub du mngon bar rdzogs par sangs rgyas par smon to / / de ga g.yu tshal mjal dum thang du gtsigs kyI gtsug lag khang mdzad pa 'dI yang lo ngo gnyis37v3la rgyal khams chen po gsum mjal dum ba dang gtsigs chen po mdzad pa'I sa gzhI <zhig> ste / 'dIr bcas pa dang sbyar na<s> 'dI yang sngon gyI 'phags pa rnams kyIs yang37v4dag par byIn kyIs brlabs pa'I sa gzhI zhIg ste / yong yang 'dI lta bu'I legs pa chen po dus gcig du byung ba'I don du btsigs pas lhag par yang bsod nams che zhIng bkra shIs par mngon te /38r1 / / bsod nams chen po de dag gI byIn kyIs gtsung lag khang 'dI yang nam nyI ma dang / zla ba yod kyI bar du yun du brtan ba dang / 'phrul kyI lha btsan po khrI gtsug lde brtsan gyI zha snga nas / sku tshe ring zhing38r2chab srid che ba dang / dgongs pa yId bzhIn du grub par smon to / / sngon rgya drug dang chab srId la ma mjald te nold pa dag gI dus na lha sras dbu bang rmog brtsan po dang / blon po dpa' 'dzangs38r3ldan zhIng dgra thabs mkhas pa'I skyims kyIs dgra la phog pa dang / dmag mang po'I mthu brtsan pos dgra'I mkhar phab pa dang / g.yu bzlog pa dang / yul bcom ba dang / mnangs bcad pa la38r4stsogste / dgra'I myi phyugs mang pho srog dang bral ba dang ma byInd par blangs pha'I dngo sdIg cI mcis pa yang bsod nams chen po 'dI'i byIn dang zil kyIs mnand te zhu zhIng byang bar smon38v1to / / dkon mchog gsum la mcod cIng yon phul ba dang / dngo sdig bshags pa la stsogs pa'I bsod nams kyIs rjesu bsngo zhIng dmyigs pa dang / bzod pa dang 'thol tsangsu38v2gsol ba la stsogs pa smon lam gzhan yang / bla nas mdzad pa dang mthun bar smond to / / (vermilion<) /:/ de ga g.yu tshal gtsigs gyI gtsug lag khang du mkhar tsan38v3khrom chen pos smon lam du gsol ba / / (>vermilion) bod rje blon dbu rmog brtsan sgam dkyel chen po'I sku rIl la / bar du rgya drug dang 'jang rgyal khams chen po gsum gyis chab srid kyI mdab du38v4[bsngos (/bsdos)] pa las / rje dbu rmog brtsan blon po rIn po che dpa' rtsal dang ldan ba'I byin rlabs kyIs dgra bka' 'og du chud du gtsigs bka' stsald to 'tsald du mnos pa / naM zha39r1 /:/ myi rabs kyI gtam brjod kyI bar du legs pa'I bka' drIn dgugs kyis zIn to 'tsal la khebste brjod pa'I gtsigs kyI gtsug lag khang bzhengs par rgyal khams chab srid kyI la39r2ltod pa'I slad du lha sras khrI gtsug lde brtsan gyi zha snga nas thugs kyI phrin las su mdzad pa dang / blon chen po zhang khrI sum rje dang / chen po zhang lha bzang gIs dgra rgya drug gI g.yul39r3chen po bzlog pa la stsogs pa thabs ches dgra la gnad par bgyIs pa dang / khom mkhar tsan pa lta zhig bod 'bangs dpa' sran la stend pa'I tshul bzhin du39r4lo ngo gcIg la g.yul chen po gnyis bzlog pa'I dpa' ba'I rna drangs pa la stsogs ste / bod rjes 'bangs kyIs chab srid la [sngo (/sdo)] ba'I slad du dbugs chags la gnad pa'I sems39v1kyIs mphro btod cing rma phrung ngo 'tsal / rdul tsam ma lus phar byang bar smon lam gsol te / khar tsan khrom kyIs yon dbul ba la / (vermilion<) / / de ga g.yu tshal gtsigs kyI gtsug lag khang du kva cu khrom chen39v2po nas smon lam du gsol ba / / (>vermilion) bod rje blon dbu rmog brtsan / skam dkyel chen po'I sku rIng la / bar du dgra rgya drug 'jang rgyal khams chen po gsum kyIs chab srid kyI mdab du [bsngos (/bsdos)] pha las39v3rje dbu rmog brtsan / blon po rIn po che dpa' rtsal dang ldan ba'I rlabs kyis dgra bka' 'og du chud de / gtsigs bka' stsald to 'tsal du mnos pha nam zha myI rabs su gtam brjod kyi bar du39v4legs pa'I bga' drin dbugs gyI zIn to 'tsal khebs te / brjod pa'I btsigs kyI gtsug lag khang bzhengs par rgyal khams chab srid kyI la ltod pa'I slad du / lha sras kyI zha snga nas / thugs kyi40r1 / / 'phrIn las su mdzad pa dang / blon chen po zhang khrI sum rje dang / chen po zhang lha bzang gIs rgya drug gI g.yul chen po bzlog pa las stsogs pha bod rjes 'bangs kyIs chab srId la [sngo (/sdo)] ba'I slad40r2du dgra la gnad pa'I shugs kyIs bgyIs so 'tsal bag tsam ma lus par byang bar smon lam du gsol te / / kva cu khrom chen po nas yon du dbul ba' / / (vermilion<) / / phyug tsams40r3stong pon dpon g.yog gI smon lam du gsol ba' / / (>vermilion) dkon mchog gsum la phyag 'tsal lo / / sangs rgyas la phyag 'tsal te thams cad mkhyen pa la'o / / chos la phyag 'tsal te /40r4theg pa bla na myed pa la'o / / dge 'dun la phyag 'tsal te / phyIr myI log pa'I byang cub sems dpa' rnams la'o / / bdag dang gzhan kyI don sgrub pa'I phyir dkon mchog gsum la mchod de / sdIg pa thams40v1cad bstsald nas / bsod nams kyI rjes su yI rang ste / dkon mchog gsum la phyogs shing rten to / / thugs sgam dbu rmog brtsan ba'I rje blon thugs la 'phrul dgongs phas rgya drug 'jang las stsogs pha40v2bar du bka' myI mnyand pa yang 'bangs gnyug ma dang 'dra bar rnal du phab nas dbu rmog brtsan la chab srId che ba'I 'dab la phyogs par gsol nas / mjal dum gyi gtsigs bcas nas40v3rdo rIngs la brIs / gtsIgs kyI gtsug lag khang bzhengs nas so khams kyI khrom nI dal / yul chen po'I dbus skyId cing dar par bgyIs pa 'dI las bka' drIn che ba ma mcis pas srI zhu dang bka'40v4drIn dran ba'I mtsan ma tsam du dkon mchog gsum la yon ba'I bsod nams kyIs / bod rje blon 'khor dang bcas pha sku tshe dang mnga' thang g.yung drung du grub la bod khams na phas kyI dgra dang 'khrug pa'I myI gragste /41r1 / / lo phyugs rtag legs la gtsigs bcas pa bzhIn yun du brtan zhIng 'jIg rten dang 'jIg rten las 'das pa'I bde skyId phun sum tshogs pha dang ldan bar smon to / /41r2(vermilion<) / / 'brom (interline in black ink<) khong (>interline in black ink) spe sa'I smon lam du gsol ba' / / (>vermilion) rje bla na bzhugs pa nI lha / chab srId kyI blon po nI 'phruld / rje blon lha 'phrul kyIs gnam ral ba nI lha'I byIn kyis drubs / sa gas pa nI blon po'I rlabs kyIs41r3btsems te / gnam sa nI yId sbyar / dgra zIn nI mjal dum nas / mtha nas nI dgra myI [sdo (/sngo)] / / byang nas nI g.yag myI rdungste / bod 'bangs yongs bde skyId pa 'ba' shIg du ma bas te / nyI 'og gyI rgya khamsna41r4rgyal phran mcis pa'I rnams sems myi bde zhIng srid shor <ba'I> du dogs pa'I rnams kyang srid la myI dbab cing sems bde ba yang / rje blon lha 'phruld kyI sku yon / 'dI 'dra bar bka' drin chen po stsal nas41v1bod 'bangs yongs su bde ba'I dus nI nyI ma bzhIn du shard / <mye> men tog bzhIn du rgyas nas yul bkra shIs dbyar mo thang de ga g.yul tsal du / / blon chen po zhang khrI sum rje dang / zhang chen po lha bzang dang / bka'41v2'khor dang bdag cag las stsogs phas gtsug lag khang brtsIgs dge 'dun gyI sde btsugs rkyen dang bcas par sbyar ba'I yon kyIs / rje lha sras khrI gtsug lde brtsan gyI sgu tshe rIng / dbu rmog brtsan ba dang /41v3blon chen po zhang khrI sum rje dang / zhang chen po lha bzang dgongs so 'tsal mthar phyIn pa dang / sku tshe ring ba dang / bod rje blon kyI gtsug lag nyI ma dang 'dra bar nam zhar myI 'gyur ba dang / gtsigs brtan41v4ba' dang / bdag chag las stsogs sems can thams cad tshe rabs kyI las kyI sgrIb pa byang ste / bla na myed pa'I lha'I yang lha sangs rgyas bcom ldan 'das byams pa 'I 'khor du skye bar smon to / /