Pelliot tibétain 239

r1-1 / / rIng gur bso ba' / / gnyen yId la gcags pa'I mye ngan / / bsang ba'I phyIr / smrang dar bzosr1-2rgya khang dar khyIm las dpe blangs nas / / dmyIg bzhag du byas pa' / / shId yo lang gI rgyen / / sem shen re nagr1-3gyI rgyan / / / / rIng gur bzang zhugs dog gyI rgyen dang bcas pa 'dI lta zhIg / / lha 'I yang dkon mchog gsum lar1-4brten de / / bzang rgya dar nor gyi dmyIg chud myI gsan sbyIn gdong don stsal du 'gyIs / / lha spos gtsang masr1-5bsang / / lha sngags gnyen pos bsngags pa'I yon gyIs / / gshIn myIng 'dI zhes bgyI ba / / brgya /r2-1rnam par grol ba 'phrul gI gzhal yas khang thob ste / / myIng 'dI bzhes 'gyI ba / / brgya la / dmyal bar skyesr2-2na nI / / zhe stang dmyal srungs gyI srin pos myI zung gcIng / / dmyal gdub gsheg pa'I sems can thams cadr2-3'phrul gyI gzhal myed khang chen por btsug cIng / / dmyal ba'I sems can thams can la / / skyabs byed nus parr2-4shog shIg / / gshIn myIng 'dI zhes bya ba / / yI dags su skyes na nI / / yI dag[s] thams cad gyI sgras myI zung gcIng / /r2-5yI dag[s] bkres skom gyi sems can thams cad la skyebs byed nus par shog shIg / / gshin mying 'dI zhes bya ba /r3-1/ yI dags su skyes na nI / / yI dag thams cad gyI sgra / / / / myIng 'da zhes bya ba / / dud 'gro glen rgugs gyIr3-2gnas su skyes na nI / / dud 'gro 'i dgra tha[ms] [ca]d kyIs myI bzung cIng / / 'gro ba thams cad gyI skyebs byed nusr3-3par shog shIg / / gshIn myIng 'dI zhes bya ba / / myIr skyes na nI / / myI 'I dgra thams cad kyIs myI zug cIng / /r3-4myI 'I 'jIg pa' thams cad las skyebs byed nus par shog shIg / / myIng 'dI zhes bya ba / / lhar skyes na nI / /r3-5lha ma yIn gI dgra thams cad kyIs myI zung cIng / / lha 'I 'jIgs pa' thams cad las skyebs byed nusr4-1par shog shIg / / khams gsum gyI sems can thams cad sdug sngal gyI dgra thams cad kyIs myI zug cIng / /r4-2rnam par grol ba 'I gzhal myed khang chen por phyI par shog shIg / / gnyen khor slad ma rnams kyang bkra shIs shIng rjesr4-3bzang bar gyur cIg / / dbon lob sngo ba' / / sngun gyI las mthun ba'I rgyu / / yul cIg du skyes ste / / shas bdags / snagr4-4gyIs 'brel de / / gnyen du gyur nas / / dbyar gyI ldum bu dang 'dra bar bkod bkod pa las / / tshe snga ma la srog gcod pa'Ir4-5las byed pa'I lan gIs / / tshe thung ba'I sad pa bab ste / / myI rtag pa'I srIn gyis khyer nas gnyen sdug pa' rnams dangr5-1nI bral / de / gnyen yId la gcags pa'I mtshan ma / / chu gang dang khrel ltas gyIs nas mtshan ma / / nor gyi dbyIg las phyung /r5-2phyugs du kyu nas drangs ste / / chu gang khrel ltas su bsrId pa' / / nor phugs nas bkod / / phyugs khyu nas bkod ste / /r5-3sbyIn ba gnyen srIs su bdang pa' / / lha dkon mchog gsum la brten de / / smon lam bzang po dang / lha sngagsr5-4bzang pos bdab pa'I yon gyIs / / 'tshI 'das pa myIng 'dI zhes bgyI ba / / gnyen byams pa'I ya lad dang / /r5-5'phrul gyI go ca thob ste / / tshI 'das pa myIng 'dI zhes bya ba / / gar skyes gar skyes gyang / / lcag gshed gyI 'drer6-1srIn dang / / nyon mos pa'I sgra cha sna tsogs gyIs myI zug cIng / / 'chI bdag gyI bdud las rtsogs pa / / khamsr6-2gsum gI dgra thams cad las rgyal bar shog shIg / / / / 'phru sangs bsnga pa' / / gnye sdug cI byams pa 'I dga'r6-3srIs dang / / bu srIng brtse ba 'I sris dang / / kha bzas gtsang mar bshams nas / / lha sngags gnyan pos bdab ste / /r6-4yI dag ltogs pa' rnams dang / sems can brel phongs thams cad la / / sbyIn ba 'gyIs pa'I yon dan gyIs / /r6-5myIng 'dI zhes bya ba / / lha 'I zhal bzas dang / / bdud rtsI btung ba 'I dbang thob cIng / / sems can la / / sbyIn ba nam kar7-1gang bar gdong zhIng / / gshIn [mying] 'dI zhes bya ba dang / / sems can thams cad deng nge 'dzan gyI bzas dang / / lha 'I zhalr7-2bzas thams cad la stsogs pa las / / long spyod sna tsogs dang ltan bar shog shIg / / phru sangs las stsogs pasr7-3legs par sngo pas / / bdag cag gnyen khor slad ma mchIs pa rnams dang / / mtha' yas pa'i sems can thams cad / /r7-4bde legs phun gsum tshogs par ldan bar gyur cIg / / / / skyibs lug snga pa' / / myI nag po 'i gzhung / /r7-5shId nag po 'i lugs / / bon yas 'dod smrang / / 'dre gsur 'dod gyI rabs las / / myI basr8-1nI lug 'dzangs la / / myI bas kyang lug mthu che bar 'byung ba yang / / sems can thams gyang sar8-2so 'I las kyIs khrId pas / / lug gyIs lam drang yang myI dgos / / lug gyIs brag dral yang myI dgos /r8-3lug gyIs lam mkhan byed kyang myI nus / / lug gyIs blo byed kyang myI nus / lag dum gyIs mda' 'phen yangr8-4myI nus par / / ngon don la yid ches pas / / lha chos dkar po 'i gzhung / / myI dkar po 'i lugs shId dkarr8-5po 'i ches / / lha chos dkar po la rden nas / / lcags lag grang mo ni khong du ma bcug / / khong khrag dron por9-1nI phyir ma phyung / / don snyIng smad lnga nI spar gyIs ma bdab / / g.yang bzhI nI phrag la ma gzar / / rus par9-2dkar po nI gdun la ma rdungs / / sha dmar po ni bzangs su ma btsos / / mtho res myI 'I lug kyIs 'drer9-3'I lam ma byad / / srIn gI las nI ma byas ste / / dmIg gson myIg nI rIg rIg / / rna gson rna nI dab dab / /r9-4rus gson ru nI kyIl kyIl / / zhIng spang snar po la nI spang rtsI yan du za zhIng bzhag pa ste / / lha spos gtsangr9-5mas nI bsangs / / lha sngags gnyen pos pos bdab pa'I yon gyIs / / myIng 'dI zhes bya ba / / gar skyes garr10-1skyes gyang / / mtshon cha las bstsogs pa'I sdug sngal thams cad las thar ba dang / / skye rgan ba'I sdugr10-2sngal myed pa'I g.yung drung gyI lus thob par shog shIg / / skyib lug legs par stad pas / / gnyen dunr10-3slad ma rnams la / / rjes bzang zhIng bkra shIs par gyur cIg / / / rta sngos ba / / 'dI lta ste / 'das pa'Ir10-4dus na / / ngom mtshar rmad du byung / / sIng ka glIng gyI g.yul las / / rgyam mtsho dbus su nI / / ded pon 'khor dangr10-5bcas pa gru gyI nang du bzhugs pa las / / srIn gyI bo mo gnod spyIn 'jIg pas bzung / / lcags mkharr11-1'bar ma nang du bcug nas / / bza' bar bsham pa las / / spyan ras gzIgs gyI dbang phyug thugs rje chen por11-2dpe myed pas / / bded pon 'jIgs pa skyabs myed de mthong nas / / 'jIgs pa las skyeb cIng / / sdug sngalr11-3las bsgrol ba'I phyIr / / thabs gyI rta 'I rgyal por sprul pa nI / / snyIng rje ltan ba cang shes pa la ho / / mkha'r11-4la bya bzhIn chu bya dang 'dra / / 'jIgs myed mthur ltan / yon dan phun sum tshogs / / lcags mkhar dgur11-5rIm du / / gser gI byI ma la 'gre zhIng sprug ste / / kun du sgra skad bkang pas / / skyabs myed 'jIgs par12-1las thar par su 'dod pa / / myI sngars brtan ba'I sems kyIs nga zhon na / / ded pon 'khor bcasr12-2sgra skad de thos nas / / rab du dga' zhIng cang shes rta zhon de / / rgya mtsho las rgal de 'jIgs pa der12-3las thar / / bla na myed pa'I byang cub sems bskyed nas / / de skyId g.yung rtang thar pa de bzhIn du / /r12-4dI rIng sang ltar myI bu las zad cing / / bdag bdud kyis bzung nas / / myI bu gzhon nas shI / / rtsI dog sngar12-5na skams ste / / / / skyabs myed par gyur nas / / / /r13-1yun du phongs pa la zhon bar / don du bsam nas / / do ma rus dang myIng / rnam rta 'dI yang / / rta mchogr13-2cang shes pa la ho bzhIn du / / nam nam zha zha yun kyI phyugs gyI skal bar du bsngo 'o / / dkon mchogr13-3gsum gyI thugs rje dang / / dge ba che chung cI spyad pa'I mthus gyIs / / rta mchog khyod gyI yon dan 'dIr13-4rnam ste / / dgongs pa don grub 'jIgs pa kun las bsgral / / cI ltar lus la spu nI grangs myed zhin /r13-5phyugs dang nor gyI skyId spyod ltan bar shog / / 'jIgs pa 'i g.yul las mgyogs pa 'I shugsr14-1kyIs bsgral / / rdzum 'phrul rkang bzhI ngan tsong kun bsgra de / / phyogs bcu sangs rgyas yul na yIdr14-2bzhIn phyIn / / ma nor sgrib myed 'phrul gyI myIg gIs nI / / 'phags pa'I rdzu 'phrul mthong ba grangsr14-3myed shog / / sangs rgyas 'phrul gyI rna ba thos myed pas / / dge ba'I chos rnams ma lus thos shog / /r14-4khyed kyi sang sang gsal ba'I sgra snyan de / / 'das pa'I gnyen sa bshes kun dang phrad par shog / /r14-5mdzes sdug mthul rtsal phun sum tshogs pa des / / bde skyid g.yung drung gnas su phyIn par shog / /r15-1de ltar smon lam rgya cher bdab pa'I byIn kyI rlabs kyIs / / tshe 'das pa yang mtho ris thar pa'I gnas /r15-2thob par shog / / yon bdag slad ma rnams kyang / / bkra shIs zhIng rjes bzang par gyur cIg / / gnyen srIsr15-3g.yag sngos pa' / / thab nI ru rno / lus nI brjId bzang / 'brong stings chen 'dI lta zhIg / / gshIdr15-4nag po 'i 'dre 'i sna 'dren / / srIn gyI chos ngan pa rnams nI / / chos ngan pa bzhIn du spangs / /r15-5lus kyI drI ma bzhIn du bkrus dbyangs nas / /r16-1lha chos dkar po 'i gzhung la / / bkra shIs gyI rjes bzang po la brten nas / / ngan par ma bsam / / mda'r16-2nI ma 'phangs / / mdung gyIs nI ma bdab / / snyIng khrag dron mo ni khar ma phyung / / don snyIng smad lnga nI sparr16-3gyIs ma brabs / / lce dmar po ni mkhal du ma phyung ste / / mkha' lung g.yang par rtsI dog bza' zhIng / /r16-4gnyams dngar du bzhag pa dang / / phyugs las ngan pa ma byas pa 'I lan gyIs / / gshIn myIng 'dI zhesr17-1bya ba la / / gar skyes gar skyes kyang / / thabs la mkhas pa'I ru rnon po dang / / 'jIgs pa myedr17-2pa'I yag snyIng dpa' dang / / bsod rnam chen pa yag lus sdug pa dang 'dra ba 'I go ca thob parr17-3shog shIg / / (line drawing of a flower) / / (line drawing of a dragon) v1-1 / / / de nas gshIn lam bstan ba' / / bla na myed pa'I ye shes bsam gyIs myI khyabv1-2pa / / lha 'I spyan rnam par dag pa dang ltan ba / / sangs rgyas bcom ltan 'das thamsv1-3cad dgongs su gsol / / sems can thams cad la / / bu cIg bzhIn du snyoms parv2-1skyob pa'I byang cub sems pa / / sems pa chen po rnams gongs su gsol / / yang dagv2-2pa'I shes rab dang khams gsum gI nyon mongs pa thams cad / / rtsa nas bcom ste / cha gnyIs lasv2-3rnams par grol ba'I gong 'phang chen po rnyes pas / / 'phags pa sgra bcom ba rnams dgongsv2-4su gsol / / tshe 'das pa khyod nyon cIg / / tshe 'das pa khyod la 'jIg rten thams cadv3-1gyI / / chos nyId glo bur myI rtag pa'I dus la bab ste / / 'dus byas kyI lnga phung rgyu ma zhIg ste / /v3-2'jIg rten 'dI nas / / pha rol du 'gro ba'I pho skyab chen po 'debs pa'I dus la bab ste / /v3-3gcIg pu gnyIs su myed par / / sa tsugs myed pa'i gnas su 'gro ba'I mgon dang skyabs su nI / /v3-4sangs rgyas bcom ltan 'das dang / / byang cub sems dpa' sems pa chen po dang / / 'phagsv4-1dpa' dgra bcom ba las che ba' zhan myed pas / / de las tshe 'das pa khyod yId ma gol / /v4-2sems nI ma log par / / dus thams cad du dkon mchog gsum kyI yId la sbyos la / / dkonv4-3mchog la rjes su phyogs la / / gzhan du rngos po ci la yang yId kyI lam ma byed cIg / / semsv4-4kyI srang ma dod cig / / gzhan yang tshe 'das pa khyod nyon cig / / khams gsum gI btson ra 'dIrv5-1sgyu ma 'I lus blangs ste / / skyes so cog thams cad nI / / mthar shI ba las thar pa cIg kyangv5-2myed de / / de ltar skyes pa gcIg nas cIg du 'gro ba 'I skye shI lam nyam nga pa / / de lta bu dagv5-3yod kyIs yId la dran bar byol shIg / / 'dzam bu glIng 'dir dpag tsad brgyad khrI 'I 'og na /v5-4na rag chen po 'i gnas yod lcags gyIs gzhIng 'bar ba'I ste na / / lcags kyi khang pa 'barv6-1ba'I nang du / rag sha mthu bo che mang pos / / 'bum grangs myed par / / btso zhIng bsrag pa dang / /v6-2gdub cIng dmyal ba las stsogs de / / stug sngal myI bzad bar / / kun du 'o dod chen po 'bod cing / /v6-3smre sngags 'don pa'I na rag 'dI lta bu dag gi gnas yod kyis / / tshe 'das pa khyod lam der myIv6-4ltung pa'I bag cher byos la / / brgya la der ltung bar dogs na / / na rag chen po de la chang kyur skyob pa / /v7-1byang cub sems dpa' 'phags pa spyan ras zIgs kyI dbang po zhes bya ba yod kyIs / /v7-2de 'i mtshan dran bar byas la / / gsol ba bdab pa'I tshig 'dI dang / / sngags 'dI smros lav7-3skyabs su gsol cIg dang / / gnas ngan pa de las thar par 'gyur ro / / rnam par thugs rje sgov7-4nas / / byang cub mchog brnyas pa / / / chos mchog skyon bral tshangs pa chen po 'i dbyangs gsungsv8-1bas / / mtshan thos stug sngal zhe mdzad phongs pa'I mgan gcIg pa' / / spyan ras gzIgsv8-2dbang de 'Is skyab du gsol / / / ^'oM hrI hung pad ma prI ya sva h'a / / / tshe 'das pa khyod nyon cIg / /v8-3gzhan yang 'dzam bu glIng 'dI nas / / dpag tshad lnga brgya 'I 'og na / / yI dags kyI 'jIg rten zhes byav8-4ba / / lhag par bkres grang gIs nyon mongs pa'I / / sems can lo brgya stong du mar yang / / mchIlv9-1ma dab pa gcIg tsam yang bza' ba'I skal ba myed la / / lus kyI gos dang myI ltan zhIng / / namv9-2ka la lcags gyI ser ba drag po 'bab pas / / lo khri 'bum du cho nge sgra 'byIn ba 'dI lta bu 'I na ragv9-3kyI gnas yod kyis / / der myI 'gro par tshe 'das pa khyod bag cher byas la / / der ltung bar dogs na / /v9-4yI dags kyI lam de la chang kyur skyob par byad pa / / byang cub sems dpa' chen po nam ka mdzodv10-1ces bya ba yod kyIs / / dge ba'I bshes nyen de dran bar byas la / / gsol ba dab pa'I tshig dang /v10-2sngags gyI snyIng po 'dI smros la skyabs su gsol cIng / / stug sngal gyI gnas de las thar par 'gyurv10-3ro / / bsod nams ye shes tshogs las / dpal gI sku 'khrungs ste / / dIng nge 'dzIn nam ka mdzod lav10-4spyod pa'I mnga' rnye pa / / bkres grang ba dang phongs pa'I yI dags sgrol mdzad pa / / mgon po namv11-1ka mdzod kyIs skyab du gsol / / ^'oM ga ga na sam ba ba dzra ho da ha sa / / / tshe 'das pa khyod nyonv11-2cIg / / rgyam mtsho chen po dang / glIng chen po bzhI dang / lcags kyI rI chen po 'I bar gyI gnas lav11-3stsogs pa de dag na / / lhag par blun zheng rmugs pas / / legs nyes gyI dud 'gro byol tsong gIv11-4gnas yod kyIs / / lam ngan pa der yang myI ltung skyeb bar bag cher gyIs shIg / / brgya la der ltungv12-1bar dogs na / / byol tsong dud 'gro 'i lam der chang kyur skyob pa'I byang cub sems pa ngan tsong spyongv12-2ba zhes bya ba yod kyis / / de la dge ba'I bshes nyen la rtag par dran bar gyIs la / / gsol ba bdabv12-3pa 'I sngags kyI tshIg 'dI smros la / / skyabs su gsol / / de las thar par 'gyur ro / / de bzhIn nyIdv12-4dang mthar phyIn ba / / 'jIg rten kun du gsal pa'I ye shes sgron ma yIs / / dud 'gro rmongs pa'Iv13-1las skye bo sgrol mdzad pa' / / mgon po ngan tsong spyong gyIs skyab du gsol de / / / na ma sa rba dur gav13-2de / / ba rI sho danI / / ra dza ya da tha ga da ya ^a rI ha dI / / sam yag sam bu da ya / / dad ya tha / / ^'oM sho da nIv13-3sa rba pa pa byI sho dha nI / / shud de byI shud de / / sa rba kar rma ^a ba ra na byI shud de sva h'a / / / de ltar ngan tsong gsuMv13-4gI sgo nges par bkag nas / / sangs rgyas dang byang cub sems dpa' las stsogs pa / / 'phagsv14-1pa thams cad gyI thugs rje chen po dang / / bka' bden ba'I byin kyi rlabs kyis / / gnyen 'dun phyIv14-2ma rnams kyIs / / dkon mchog gsum la brten de / / yang dag pa'I chu gang ma nor pa'I sod namsv14-3gyI tshogs 'dI dag la / / brten cIng bdeg nas / / bde skyId phun gsum tshogs pa'I lha yul dam parv14-4'gro ba'I lam nI / / 'dzam bu glIng 'dI nas / / byang phyogs na rI rab lhun po zhes bya ba / / rI 'i rgyal pov15-1rIn po che sna bzhI las grub pa zhIg yod de / / de 'I steng na chos bzang lha 'I 'dun sa na / /v15-2lha 'I dpang po brgya' byIn dang / / blon po gsum cu rtsa gnyIs dang / / lha dang myI dang srId pa'I ltangv15-3phye zhIng lam ston pa yod de / / der lha 'I rgyal po des / / rIgs kyi bu khyod la / / chos kyI manv15-4ngag ston cIng / / bsod nams gyI mthu stongs par gyur ro / / rIgs kyI bu de nas / / rI rab gyiv16-1byang phyogs gyI rtse na / / phob brang lcang lo can zhes bya ba' / / bcom ltan 'das dpal phyag nav16-2rto rje khro bo mang po khor dang / / bcas pa bzhugs ste / / 'dod pa thams cad yId bzhIn du grub par / /v16-3rIgs gyI bu khyod la dbang bskur bar 'gyur ro / / de nas rIgs gyI bu khyod la / / phyag na rto rje byInv16-4gyI rlabs gyIs / / song la dga' ltan lha 'I gnas na / / sangs rgyas shag kyI thub pa / / chos gyIv17-1rgyal tsab / / 'pags pa byams pa zhes bya ba / / 'khor byang cub sems dpa' ba su myI dra dang / /v17-2seng 'ge bar snang la stsogs pa / / bskal bzang po 'I byang cub sems dpa' / dgu brgya dgu bcuv17-3rtsa drug la stsogs pa dang / / lha 'I bu grangs myed pa dang / / rIn po che 'I gzhal myed khang gyI nang na / /v17-4lha rdzas kyI lhab lhub dang / / rol mo sna tshogs gyI long spyod dang ltan ba / / bsam gyIs myI khyab pa lasv18-1stsogs pa / / skyId pa'I rgyu rkyen phun gsum tshogs pa / / lha yul dam pa der / / bde dgu la bagv18-2yod par spyod cig / / rIgs kyI bu lha 'I long spyod / / dga' ba 'ba' shIg gIs chog par ma 'dzIn / /v18-3bdag dang sems can kun yongs su mye ngan las 'da' par byol la / / bsod nams dang ye shes gyIv18-4tshogs btsal ba la / / myI ngoms pa'I sems zhog shIg / / 'dod chags dang bral bar yang thobv18-5par gyur shIg / / v19-1 / / de nas gshIn / / thams cad mkhyen pa 'I ye shes kyang / / mngon bar shes pa'I [---]v19-2la yang rnam par sbrul bar gyIs shIg / / chos gyI dbyIngs la yang ma g.yos shIg / / byang cub gyIv19-3sems bskyed pa la yang ma gdang shIg / / de bzhIn gshegs pa 'I rnam par 'phrul ba dang / / byInv19-4gyI rlabs kyIng yongs su rton cIg / / / lha yul du lam bstan ba rdzogs so / / ^'oM / / / /