Old Tibetan
Documents Online
Google
Find on this site

Valid HTML 4.01 Transitional

Text Archives > insc_Skar

insc_Skar
    This Text All the Texts  

1. Content :

2. Note :

3. References :

Transliteration   (Change the Display Format)

(1) $ / / 'phrul gyI lha btsan po khri lde srong brtsan gyi ring
(2) la / / dam pa'I chos yun du brtan bar gtsigs
(3) brnan pa / /
(4) $ / / 'phrul gyI lha btsan po / myes / khrI srong brtsan gyi
(5) ring la / / sangs rgyas kyI chos mdzad de / / ra sa'i gtsug
(6) lag khang las stsogs pa brtsIgs shing / / dkon mchog
(7) gsum gyI rten btsugs pa dang / / myes / khri 'dus srong gI
(8) rIng la / / gling gI khri rtse las stsogs par / gtsugs lag
(9) [kha]ng brtsIgs ste / / dkon mchog gsum gyI rten btsugs
(10) pa dang / / myes / khrI lde gtsug brtsan gyI ring la / / brag mar gyI
(11) kva cu dang mchIng phur gtsug lag khang brtsIgs ste / / dkon
(12) mchog gsum gyI rten btsugs pa dang / / yab / khrI srong lde
(13) brtsan gyI ring la / / brag mar gyI bsam yas las stsogs
(14) pa / dbung mthar gtsug lag khang brtsIgs ste / / dkon
(15) mchog gsum gyI rten btsugs pa dang / / lha btsan po / khri /
(16) lde srong brtsan gyI ring la yang / / skar cung gtsug lag khang
(17) las stsogs pa brtsIgs ste / / dkon mchog gsum gyI rten
(18) btsugs pa las stsogs pa / / gdung rabs rgyud kyIs /
(19) 'dI ltar sangs rgyas kyI chos mdzad pa 'di / / nam du yang ma
(20) zhIg / ma btang na / / legs pa dpag du myed par 'gyur / /
(21) btang ste / zhIg gam / myed par gyur na / / sdig pa grangs myed
(22) par 'ong bas / / da phyIn chad nam nam zha zhar / / 'phrul gyI lha
(23) btsan po / yab / khrI srong lde brtsan gyI ring la / / dkon mchog
(24) gsum gyI rten btsugs pa dang / sangs rgyas kyI chos mdzad pa
(25) myI gtang ma zhig par / / gdung rabs rgyud kyIs yi dam bca'o
(26) zhes 'byung ba las stsogs pa / / btsan po yab sras / / rje
(27) blon / kun kyIs dbu snyung dang bro bor te / / gtsigs kyI yi ge dang /
(28) rdo rIngs la bris pa bzhIn du yang mdzad do / / 'dI ltar / / yab
(29) myes / gdung rabs rgyud kyIs / / dkon mchog gsum gyI rten
(30) btsugs shIng / sangs rgyas kyI chos mdzad pa 'di / / gces spras cI
(31) la yang / sdIg go zhe'am / ma legs so zhes / / mo dang rmyi ltas las
(32) stsogs ste / cI'i phyir yang rung ste / myI gzhig go / myI spang ngo / / de skad
(33) ces / che chung sus gsold kyIs kyang / de ltar myi mdzad do / / btsan
(34) po dbon sras / / sku chu ngur bzhugs pa yan cad / / chab srId kyi
(35) mnga' bdag mdzad pa man chad kyang / / dge slong las / dge ba'I
(36) bshes nyen bskos ste / chos thugs su cI chud chud du bslab cing / / bod
(37) yongs kyIs kyang chos slob cing spyad pa'I sgo myi gcad / nam du yang bod ya
(38) rabs man cad / bod 'bangs las thar par gzud pa'I sgo myi bgag
(39) par / dad pa'I rnams las thar par btsud de / / de'i nang nas
(40) nus pa las / / bcom ldan 'das kyI ring lugs rtag du bsko
(41) zhIng / / bcom ldan 'das kyI ring lugs byed pa'I rnams chos 'khor
(42) nas bya'o cog gI bka' la yang btags ste / / chos 'khor gyI las dang
(43) dbang byed cIng / dge ba'I bshes nyen byed par bsko'o / / rab du byung ba'I
(44) rnams / / nged yab sras kyIs / mchod gnas su gnang ba bzhIn du byas
(45) ste / / btsan po'i / pho brang na dkon mchog gsum gyI rten btsugs shIng /
(46) mchod pa yang / / gu du myI spang myi bskar zhIng mchod gnas su bgyI'o / /
(47) mdor na / / btsan po'I / pho brang dang / bod khams na / dkon mchog gsum myed
(48) pa dang / spang ba'I thabs cI yang myI mdzad do / / yab myes dbon sras
(49) gang gI ring la yang rung ste / dkon mchog gsum gyI rkyen bcad pa'i rnams
(50) kyang ma dma's ma zhIg pa'I chos su / / lha rIs kyi khyIm yIg gI mgo nan las
(51) 'byung ba bzhIn du chis mdzad do / / da phyIn chad gdung rabs re re zhing yang /
(52) btsan po yab sras kyIs / 'dI bzhin du yI dam bca'o / / de las mna' kha
(53) dbud pa dag myI bgyI myi bsgyur bar / / 'jIg rten las 'das pa dang / 'jIg
(54) rten gyI lha dang myI ma yIn pa thams cad kyang / dpang du gsol te / / btsan po /
(55) rje blon kun kyIs kyang / dbu snyung dang / bro bor ro / / gtsigs brnand pa'I
(56) yI ge zhib mo ni / yab kyI ring la gtsIgs kyI yi ge brIs pa'i [z]la [la]
(57) bzhag go / /