Old Tibetan Documents Online བོད་ཡིག

Text Archive > Pt_0126

Pelliot tibétain 126
    This Text All the Texts Find both and  

1. Content : 1. 'Phrul kyi byig shus phyi ma la bstan pa'i mdo (ll. 1-103). 2. A dialogue between the ruler of Dmu and an envoy of Phyva, two important clans in the ancient religion (ll. 104-168).

2. Note : scroll. The beginning and the end are missing. Recto, 168 lines. The line 14 is integrally deleted at origin and is not included in this edition. Verso, 2 Chinese Buddhist texts. Cf. Catalogue VI (22).

3. References :

Choix I (pls.128-136, notice 21), Choix IV (1-6) [I.Translit.].

Lalou (1939-1961: I, 44) [P.Translit.], Stein (1959: 62, 64), Macdonald (1971: 305-306, 369-373), Yamaguchi (1983: 171-172, 211) [P.Trans.], Yamaguchi (1985: 546-549) [P.Trans.], Luo (1989) [P.Translit., P.Trans.], Chu (1990) [P.Translit., P.Trans.],Ishikawa (2000) [P.Translit., P.Trans.], Ishikawa (2001) [P.Translit., P.Trans.].

Transliteration   (Change the Display Format)

(1) དང་གདན༎ [ཆ?]དུ་[---] [དགའ?]ལ༎ སྡིགsd[i]g པ་ངན་
(2) དགུ་གཏོང་མྱི་ཕོད༎ ཚེ་ཅིག་བཙན་ཕྱུག་མཆོག་དུ་འཛིན༎
(3) ལྷ་ཆོས་བཟང་པོ་གཅིག་མྱི་སྤྱོད༎ མ་ཚོར་བར་དུ་བདུད་
(4) ཀྱིས་ཁྱེར༎ གནའ་མྱི་འཛངས་ཤིང་ཆེ་དགུ་ཡང༎ ཚེ་རིང་ད་ལྟ་
(5) གཅིག་མྱི་སྣང༎ ཤི་ཟིན་ཕན་ཅད་ས་ཕུང་ཡིན༎ མྱི་ཅིག་
(6) སྐྱེས་པའི་ཚེ་དུས་ལ་རིང་པོར་མྱི་ཐོགས་དེའུ་རེ་མྱེད༎ ཁྲེལ་
(7) དང་གཟུངས་མྱེད་མནའ་ཡང་བཟའ༎ མཐའ་མ་ཡུན་དུ་
(8) ལེགས་མྱི་སྤྱོད༎ ཚེ་སྲོག་ཐུང་བ་གློག་པར་མྱུར༎ གསོན་
(9) དང་བྱེ་སྟེ༎ དུར་དུ་བསྐྱལ༎ སྡིག་བྱེས་གྲོགས་པོ་རྟག་
(10) པར་འདྲེ་དང་སྲིན༎ གཏན་ཀྱི་གྲོགས་ངན་སྐྱིད་མྱི་
(11) མྱོང༎ དགེ་སྡིག་མྱི་ཤེས་ཉོན་རེ་མོངས༎ ནང་ནུབ་མྱི་དལ་
(12) ཕྱུག་པོར་འདོད༎ ལྷག་པར་ཡོད་ཀྱང་ཆོག་མྱི་ཤེས༎
(13) ཤྀ་བའི་རེ་མོ་ཀུན་ལ་འོང༎
(14)
(15) ཤི་ཟིན་ཕན་ཅད་ཅི་ཤེས༎ བསག་ཤྀང་བདོག་པ་ཀུན་དང་
(16) བྲལ༎ ཕྱི་ན་ཅི་ལུས་བདག་མྱི་དྲན༎ ་ལེག་ལེགས་ པ་འབའ་ཤིག་
(17) གྲོགས་སུ་འོངས༎ བྱད་བཞིན་བཟང་པོ་ཀླུ་དང་སྨན༎
(18) མྱི་སྡུག་མཐར་མར་སྐམ་ཀྱིས་མྱེད༎ གོས་ཟས་བཟང་པོ་
(19) ཟའ་བོག་དར༎ ཅིར་ཡང་མ་རུང་རྡུལ་དུ་གྱུར༎ གཤིན་
(20) ཆ་བཟང་པོ་བགོས་མྱི་ཕན༎ ཁ་ཟས་བཟང་པོ་དུར་དུ་
(21) བཅུགས༎ ལོ་སྟོང་བར་ཀྱི་བརྒྱགས་ཡོད་ཀྱང༎
(22) ཟ་བའི་དབང་མྱེད་ཡུན་དུ་ལུས༎ བཟང་སྡུག་གཉིས་
(23) ཤྀག་དུར་བཅུག་ཀྱང༎ ཁོག་སྐམ་གཉི་ཤིག་དགར་མྱི་དྲན༎
(24) གཉེན་སྡུག་གཉི་ཤིག་སྔས་ན་དུ༎ ཁྲི་འབོད་སྟོང་འབོད་
(25) རྣས་མྱི་ཐོས༎ གསོན་གཤིན་ལམ་གཉིས་སོ་སོར་གྱེས།
(26) ཤི་བའི་ཉོན་མོངས་ཀུན་འིས་བརྗོད༎ གཉེན་དང་བཛའ་བཤེས་
(27) ཕྱི་ན་ཚོལ༎ ཁང་ཁྱིམ་བཟང་པོ་འདུག་དབང་མྱེད༎ མ་ཚོར་
(28) བར་དུ་བདུད་ཀྱིས་ཁྱེར༎ བཟང་སྡུག་གཉི་ཤིག་འདུག་དབང་
(29) མྱེད༎ ལོ་བརྒྱའ་ཚེ་ཡང་འདྲོན་པོ་འི་ཞག༎ གཤིན་རྗེའྀ་
(30) སྦྲོན་འོས་སོ་སོར་ཁྱེར༎ ཤར་ནུབ་འདུལ་ཡང་ངོ་མྱི་ཤེས༎
(31) ཤག་ཉེར་ཀུན་འིས་བྱོལ་མྱི་བཏང༎ ལེགས་པ་འབའ་
(32) ཤིག་གྲོག་གྲོགས་ སུ་འོངས༎ གསོན་གྱི་ཚེ་ན་བཙན་ཕྱུགས་སྒྲུན༎
(33) ཤི་བ་འྀ་འོག་ལེགས་ཉེས་བསྒྲུན༎ མཐོན་མན་ཀུན་ཡང་སྡིག་ཡུལ་
(34) གཅིག༎ ལྷ་ཡུལ་སྒྲོ་མོར་ཆེ་ཆུང་མཚུངས༎ ལེགས་རྒུ་བྱས་ན་
(35) དཔལ་དུ་སྐྱེ། ཉེས་རྒུ་བྱས་ན་བྱུས་དུ་གྱུར༎ འདི་གཉིས་གང་བྱ་ཞིབ་
(36) དུ་བརྟོགས༎ ཤི་བ་ཡང་དག་ཐར་བ་མྱེད༎ བདུད་འོངས་ནད་འོངས་
(37) ད་གཟོད་སྐྲག༎ ལུས་སྲོག་གར་སྦ་བློ་མྱི་རྙེད༎ འགུག་ཅིང་སྦྲོན་བ་ཐད་
(38) དུ་འོངས༎ གཤིན་རྗེའི་བདུན་དུ་ཅི་སྐད་བཤག༎ དཀར་ཆགས་
(39) པླགས་ན་ལེགས་མ་བྱས༎ སྲིན་གྱིས་བཟུངས་ཤིང་ཟངས་སུ་བརྩོས་
(40) སྡིག་ཡུལ་ཀུན་དུ་ཁྱབ་པར་ཁྲིད༎ སྐྱིན་འདང་འབབ་དུ་སྡིག་མྱི་
(41) འབྱང༎ འཆི་བའི་དུས་ན་བཙན་ཉེན་མྱེད༎ སྐྱེ་དགུ་ཀུན་ཡང་གཅིག་མྱི་
(42) ཐར༎ གསོན་གྱི་ཚེ་ན་ལེགས་མ་བྱས༎ ཤི་བའི་འོག་དུ་བཞར་མ་རུངru[ng?]
(43) འདི་དག་གད་བྱ་ཞིབ་དུ་བརྟོགས༎ ལེགས་ཉེས་མྱི་ཤེས་གསོད་པ་དང༎ ཆང་
(44) ཐུང་བའི་ཚུལ་བཤད་པ༎ བདག་གྱི་ཆུང་མ་དགོས་མྱི་བྲིན༎ གཞན་གྱི་ཆུང་མ་
(45) གསེར་བས་བྲིན༎ ཡང་དག་བདེན་ཆོས་མྱི་རྟོག་ཅིང༎ ཕྲ་མ་ཁྲུགས་མ་
(46) མཆོག་དུ་འཛིན། ཤ་ཆང་གྲལ་ན་རན་འཛང་རྟོད༎ ཁྱལ་བའི་སྨྱོ་ཚིག་ཆེད་
(47) དུ་ཟེར༎ ལྷ་ང་ནང་དུ་སྡིག་མྱི་བཤག༎ བདེ་བའི་ཚེ་ན་ལྷ་མྱི་དྲན༎ ན་བའི་
(48) ཚེ་ན། ལྷ་ལྟོས། སྡིག་ཏོ་མྱི་ལ་ལྷ་མྱི་འགོ༎ ལྷ་ཆོས་ཐོས་ན་དཔྱས་སུ་
(49) འཛིན༎ ཤ་ཆང་མཐོང་ན་སྲོག་ཀྱང་བསྡོ༎ ལྷ་ཆོས་བྱེད་ནའ་འོན་ཞིང་རྣེགས་
(50) སྒྱུ་མའི་དོན་མྱེད་སུན་མྱི་འབྱིན༎ འཕྱོ་གཡམ་བྱེད་པ་སྐྱོ་མྱི་ཤེས༎
(51) མྱྀ་འི་མྱི་གྲངས་ཕྱུག་ཀྱི་ཆོས༎ སྡིག་ཡུལ་ཀུན་དུ་བཙལ་མྱི་དགོངས་
(52) སྡིག་ལམ་གསུམ་ལས་ཐར་མྱི་མྱོང༎ གནག་ལུག་ཀུན་བསད་ཟངསzang[s]
(53) སུ་བཙོས༎ ཁྲ་སྒྲིག་ཐོགས་ཤིང་རི་ལུང་རྒྱུག༎ གཞན་ལ་ན་
(54) ཚ་བདག་མྱི་ཚོར༎ པགས་བཤུས་ཤ་བཤས་སོ་སོར་ཟའ༎ འདྲེ་
(55) བཀྲེན་ཕར་སྤྱང་ལྟོགས་པ་འདྲ༎ ལྷ་ཆོས་མྱི་བྱེད་སྨྱོ་ཞིང་རྒྱུག་
(56) མྱི་འི་མྱི་གྲངས་འདྲེ་དང་མཚུངས༎ སྡིག་ཡུལ་ཀུན་དུ་བཙལ་མྱི་
(57) དགོས༎ བདག་ཀྱི་ལུས་ལ་ཚོགས་པར་ཡོད༎ སེམས་ཤན་ཐམས་
(58) ཅད་གསོན་པོར་འདོད༎ བསད་པའི་ན་ཚ་ཀུན་མྱི་དགའ༎ སྲོག་
(59) ལ་འཕངས་པར་ཆེ་ཅུང་མཚུངས༎ གཞན་འིས་བདག་བསད་ཤ་
(60) ཟོས་དཀའ་མྱི་དཀའ༎ དེ་ལས་སོམས་སྟེ་ལྷ་ཆོས་བྱོས༎
(61) ༄༅༎ ཆང་ཐུང་ཁྱེལ་བ་དུག་དང་མཚུངས༎ ཅི་ཡང་མྱི་དྲན་
(62) སྨྱོ་བའི་ཚུལ༎ བཞིན་འགྱུར་སྟབས་ཁྱེབས་ཚིག་མྱི་བདེན༎
(63) མཚོན་དང་ངག་ཤོར་སྲོག་ཀྱྀ་བདུད༎ སྐྱུགས་པ་ཁར་བྱུང་སླ་ཚ་
(64) བྲོ༎ ནང་པར་ལངས་ནས་ཉམས་མྱི་དགའ་ག+འ་ ༎ ལས་ཀྱི་བུན་བྱུང་
(65) ཉོན་རེ་མོངས༎ ཟས་ཀྱྀ་གྲོན་ཆེ་སོ་ནམ་སྟོང༎ ནམ་ཞིག་
(66) ལེགས་པ་ཞིབ་དུ་རྟོགས༎ ངན་པའི་ཚུལ་བཤད་པའ༎ ༎
(67) ཤ་ཟོས་ཆང་ཐུང་ཐབ་མོ་བྱེད༎ ཉིན་མཚུན་ངན་བྱེད་བདག་
(68) མྱི་ཚོར༎ འགྲམ་སྤུ་སྐྱེས་སུ་ཆོས་མྱི་བྱེད༎ བྱེད་བཞིན་
(69) བཟང་པོ་གཉེར་མར་གྱུར༎ ཁོང་ཞོམ་སྐྱིབས་དགུ་མངའ་
(70) མྱི་སྡུག༎ དམྱིག་མདོམས། རྣ་འོན་བཟང་མྱི་རིགས༎ [---]
(71) འདམ་ལག་འདར་འགྲོ་མྱི་ཕོད༎
(72) སྤྱི་ཆར་ཁ་བོག་རྡ་མྱི་ཕྲད༎ ཤ་ཟད་པགས་རྙིལ་སྐམ་ལ་ཐུག༎
(73) ཡར་ལང་མར་འདུག་གོག་ཅིང་ཕྱེ༎ བུ་ཚའི་སྙིང་དུ་ཕྱིར་མྱི་སྡུག་
(74) བསམ་ནའ་མྱི་དགའ་དགུན་མྱི་ཆད༎ བདག་ཤྀ་སྐྱིན་འབར་གཞར་
(75) མྱི་འགྲོ༎ འདུག་པའི་ལོ་གྲངས་ཟད་ཀྱིས་མྱེད༎ ད་ཅུང་ངན་
(76) བྱེད་བདག་མྱི་ཚོར༎ ལེགས་པའི་ཆོས་ཀྱང་ཟད་ལ་འདས༎
(77) ལེགས་པ་མ་མཐང་ད་དུང་སློབས༎ ༎ སྲྀ་ཞུའི་མདོ་བཤད་པའ༎
(78) ཕ་མ་མཐོང་ནའ༎ ཚིག་པ་ཟའ༎ བུ་སྨད་མཐོང་ན་དགའ་བར་
(79) འཛིན༎ ཕ་མ་བཙལ་ན་གཞན་མྱི་རྙེད༎ བུ་སྨད་བཙལ་བ་རྙེད་པཱ་པ+འ་ཪཱེཨཱཌ༔་པའྀ་
(80) སླ༎ ཕ་མྱེད་ན་ནི་མྱི་སྐྱེ་འོ༎ མ་མྱེད་ན་ནྀ་མྱི་སོས་སོ༎ མའི་བུ་
(81) གསོས་ཤིན་དུ་དགའ༎ ཐོག་མ་ཆགས་ནས་ཉམས་མྱི་བདེ༎
(82) མ་བྱུང་བར་དུ་ཉོན་རེ་མོངས༎ ཟླ་བའ་བ+འ་ ཚངས་ནས་བྱེ་བྲག་ཕྱིད༎
(83) ལུག་བསད་ཤ་གཞི་འོག་དང་འདྲ༎ གཡས་གཡོས་ཀུན་
(84) ཀྱང་ཁྲག་འིས་གང༎ ན་ཚ་མྱི་བཟད་ཤི་ལ་ཐུག༎ གཤེས་
(85) གྲང་མལ་དུ་མ་བདག་ཉལ༎ སྐམ་དྲོ་མལ་དུ་བུ་
(86) སྡུག་བསྙལ༎ མ་སྙིང་རྟག་དུ་བུ་ལ་ཆགས༎ སྐ་ཅིག་མྱི་
(87) བཟོད་ཉོན་རེ་མོངས༎ སྐྱེས་ན་ཆུང་མའི་ངག་ཉེན་ཅིང༎
(88) ཕ་མ་གཤེས་ན་དམྱིག་འོར་བྱེད༎ བུ་སྨད་མཐོང་ན་དགའ་
(89) བར་འཛིན༎ དེ་ལྟྀའུ་བུའི་སྡིག་ཡུལ་དུ༎ ཕྱིན་ཅིང་ནམ་
(90) དུ་ཡང་ཐར་མྱི་མྱོང༎ དེ་ལས་སོམ་སྟེ་སྲི་ཞུ་བྱོས༎ ་ལེག་ལེགས་
(91) ཉེས་ཀྱི་མདོ་བཤད༎ ་ལེག་ལེགས་ པ་མྱི་ཤེས་གསོད་དགའ༎ ཀུན་
(92) ལ་དངན་བྱེད་འདྲེ་དང་འདྲ༎ བྱམས་གཤིང་ཤིང་ ཀུན་གསོས་
(93) ལྷ་དང་མཚུངས༎ ནལ་གཡམ་རྩོག་པའི་མྱི་དག་
(94) ལ༎ ལྷ་མནོལ་ཞིང་ནི་བྱུར་དུ་འགྱུར༎ མྱི་གཡམ་ཁོང་
(95) གཙང་ཡ་རབས་ཐུ༎ ལེགས་དགུ་སྤྱོད་པ་དཔལ་དུ་སྐྱེས་
(96) གྲོགས་པོ་རྟག་པར་ལྷ་དང་འགྲོགས༎ རྐུན་ཕྲོག་
(97) བྱེད་པ་ཀུན་ཀྱི་གཅན༎ རྐུ་བར་མྱི་བསམ་ཀུན་ཀྱིས་
(98) བསྟོད༎ རྩོད་པར་མྱི་འདོད་ཉམས་སྙིང་བདེ༎ ཁྲོག་གཏུཾ་
(99) ཞེ་སྡང་འཁོན་ཀྱི་ཚང༎ ཀུན་ཀྱང་མྱྀ་འདུམ་སྲིད་ཀྱི་གཞིས་
(100) ཁོང་མཉེན་ཚིག་འཇམ་ལེག་ལེགས་ ཀྱི་གཉེན༎ མང་པོ་མདུ་
(101) བ་ལེགས་ཀྱི་སྣོན༎ རྫུན་ཅེན་ཕྲ་མ་སྲིད་ཀྱི་གདོན༎
(102) བྱམས་པའི་མདོ་མྱེད་འཁྱམ་བ་ཡིན༎ འཕྲུལ་ཀྱྀ་བྱིག་
(103) ཤུས་ཕྱི་མ་ལ་བསྟན་པའྀ་མདོ་རྫོགས་སོ༎
(104) ༄༅༎ གནའ་དང་པོ། གཞེ་ཐོག་མ། དམུ་དང་ཕྱྭ་གཉེན་བའི་འཚེ། ཕྱྭ་འི་ཕོ་ཉ་དམུ་འི་ཐད[tha?]d དུ་མཆིས་པའ།
(105) དམུ་འིས་བཀའ་སྩལ་པ། ངེད་ཀྱི་དམུ་ཡུལ་འདི་དག་ན། དགའ་ལྷ་བྱེད་ནི་ནམ་མྱི་ནངས་ལ། དྲོ་ཉི་འོད་ཀྱིས་
(106) ནི། མུན་མྱི་སྲོས་པའི་ས་ཡུལ་འདི་དག་ནི། གཡའ་མཐའ་ནི་གངས་ཀྱིས་བསྐོར། མཐིང་མཐའ་ནི་དག་གྱིས་
(107) བསྐོར་ཏེ། མཐོ་སྟེ་བྱ་མྱི་ལྡིང་ལ། དམའ་སྟེ་བྱི་མྱི་ཟུལ་བའི་གྲ་གྲུ་འདི་དག་ན༎ ཆུ་ཆུན་[ནོང?]ནོར་ བུ་དག་
(108) སྦྲོན་དུ་འོངས་པའི་མཆིད་ན་རེ། ཕོ་བྲང་ཁབ་སྒོ་ན། བང་ངེ་བུང་ངེ་སེ་རུ་ལོང་ལོང། ནེའུ་བུན་བུན་པོ། མྱི་ཅུང་པོ་ཀ་
(109) ཙམ་ལ། རྟ་ཅུང་ལྒོ་བ་ཙམ་ཁ་ཅིག་གདའ་འོ་སྐད་ན༎ མྱི་ནི་སུ་འི་མྱི། བྱོན་ནི་གང་ནས་བྱོན། དོན་ནོ་སུ་
(110) ལ་གཉེར། དྲག་དུ་རྨེད་པས། ཞིབ་དུ་སྤྲིངས་ཤིག༎ ༎ ཕོ་ཉས་ལན་བཏབ་པའ་པ+འ་ ། བདག་
(111) ཅག་ནི་འཕྱྭ་འི་འབངས། ཕྱྭ་འིས་བཀའ་སྩལད། རྗེ་ནི་ཞུ་ཕུད་ནས། མགོ་ནག་འགྲེང་ལ་རྗེ་མྱེད་
(112) རྗེ་སྐོས་ལ། རྔོག་ཆགས་དུད་ལ་ཁྲམ་ཐོབ་ཅིག་ཅེས་བཀའ་སྩལད་པ། འདེབས་ཤིང་མཆི་བའི་
(113) ཤུལ་ཀ་ན། བབ་དམུ་ཡུལ་དུ་བབ་སྟེ། དགའ་ནི་ལྷ་བྱེད། དྲོ་ནི་གཉེན་བྱེད། ཡར་ནི་ལྷ་མཆོད། མར་ནི་[སྲི?]
(114) གནོན་བའི་ཐད་ཀར་བབ་སྟེ༎ བདག་ཅག་ངན་པ་ཡང་ལྷ་ལ་ནི་ཡོན་འབུལ། དམུ་རྗེ་ལ་ནི་བཀོད་ཙམ་
(115) འབུལ་ཞིང་སྤྱང་ངར་མཆིས༎ པའི་ཕོ་ཉ་ལགས༎ ། དམུ་རྗེས་བཀའ་སྩལད། པའ༎
(116) མྱི་ཁྱོད་ཅག་ཀྱི་བཀའ་མཆིད་ལ། གཡོ་སྒྱུས་བསྣན་པའི་ཤོ་གེ་དག་རབ་དུ་ཆེ་བས། ཤུལ་ནེར་བར་བྱོན་བ་
(117) འདྲ། ནོར་ཚབས་དག་རབ་དུ་ཆེ་བས། སྔར་གི་ཤུལ་གང་ལགས་པ་དེ་ཁོ་ཟུང་ལ་སླར་གཤེགས་ཤིག༎ ཕོ་ཉས་
(118) ལན་བཏབ་པའ་པ+འ་ ༎ བདག་ཅག་རྩང་སྨད་མདོ་ནས་ཚུར་མཆིས་ན། ཤུལ་ཡང་ནོར། ཏེ༎ རི་རོང་ནི་སྩུབ། ཆུ་རྫབ་
(119) ནི་ཆེ། མྱི་དང་མཇལ་པ་ལས། སྐྲ་ནི་འཁམ་པ་དམྱིག་ནི་སེར་བ། སྐད་ནི་འཛེར་བ། རྐ་ལག་ནི་ཁྱོར་བ་
(120) ཅིག་དང་མཇལ་ཏེ། སུ་འི་མྱི་ཞེས་བདག་ཅག་ལ་འདྲི་འོ། བདག་ཅག་ཀྱིས་ཀྱང། དྲང་པོར་སྨྲས་ཏེ། དམུ་འི་ཡུལ་དུ་
(121) ཕྱྭ་འི་ཕོ་ཉར་མཆི་ཞེས་བགྱིས་ན། ཁོ་འི་མཆིད་ནས། འོ་ན་ཁྱོད་ཅག་ནོར་པར་འོངས་ཏེ། ཡུལ་འདི་ནི་
(122) སྲིན་གི་ཡུལ་གིས༎ དམུའི་ཡུལ་ནི་ཤར་ལྷོ་འི་ཚམས་ན་ཡིན་བས། དེ་ལྟར། སོང་སྐད་ནས་ཤུལ་
(123) བསྟན། ཏེ། ད་ལྟར་དམུའི་ཡུལ་འདབ་དུ་འཕེབས་ན། མྱི་དང་མཇལ་ན། མྱི་མགོན་པོ་བས་ལེགས་
(124) སྐད་མདངས་ནི་འབྲུག་སྐད་པས་ཆེ་ལ་སྙན། དྲི་གསུང་ནི་སྤོས་ཀྱི་དྲི་བས་གདའ་འོ། ད་རྗེ་འི་སྤྱ་ངར་སྐུ་
(125) བླ་ལ་ཡོན་འབུལ། དམུ་རྗེ་ལ་བཀོད་ཙམ་འབུལ་ཞིང་ཞལ་མཐོང་བར་ཅི་གནང༎ ༎ དམུ་རྗེས་
(126) བཀའ་སྩལད་པ། ངེད་ཀྱི་ཡུལ་འདི་དག་ན། ས་འཚམས་ཀྱི་སྟག་འཕྲེང་ཁྲི་སྐུགས་དག་ན། གླེས་པ་སྟག་དང་
(127) གཟིག། དོམ་དང་དྲེད་ལས་བསྩོགས་པ་མང་པོར་མཆིས་ན། དེ་ཀུན་གཅིག་དང་ཡང་མ་ཕྲད་ན། ཁྱེད་ཅག་གནམ་ནས་འོངས་
(128) ན་ནི། ཕུར་བའི་འདབ་ཤོག་མྱེད་ལ། ས་ལས་འཛུལ་ཏེ་འོངས་ན་ནི་བྱི་བ་མ་ཡིན་ན། ཁྱེད་ཅག་གི་ཚིག་ལ་ཟོལ་མང་
(129) བས་སླར་གཤེགས་ཤིག༎ ༎ ཕོ་ཉས་ལན་བཏབ་པ། བདག་ཅག་ངན་པ་ལ་སྒྱུ་དང་ཟོལ་མ་མཆིསmch[is]
(130) དམུ་རྗེ་འི་སྟག་ཕྲང་གཟིག་ཕྲང་ན། གླེས་པ་སྟག་གཟིག་དང་ཡང་མཇལ། དོམ་དང་དྲེད་དང་ཡང་མཇལ།
(131) ལ་ལ་ནི་བཙས་ཕུལ། མྱི་ལ་ནི་ཡོན་ཕུལ་ནས། བདག་ཅག་ངན་པ་ལ་ཤུལ་བསྟན་ནས། དམུ་རྗེ་འི་སྤྱ་ངར་མཆིས་
(132) པ་ལགས༎ ༎ དམུ་རྗེས་བཀའ་སྩལ་པ༎ ཁྱེད་ཅག་གི་ཚིག་ལ་ཡོང་ཟོལ་ཡོད་པས། ངེད་
(133) དམུ་འི་གཅན་པ་གླེས་པ་ལྕགས་ཀྱི་མྱི་རྟ་ཞུབ་རླུང་ལྟར་ནི་ཕྱོ་ལ། གློག་ལྟར་ནི་མྱུར་བ། ལྕགས་ཀྱི་རི་བོང་ལ་ལྕགས་ཀྱི་
(134) ཁྲ་བཀྱེ་སྟེ། སྟེ་ལེན་དུ་ལེན་བ་དག་ཀྱང་ཡོད་ན། དེ་ཀུན་གཅིག་དང་ཡང་མ་ཕྲད་ན། ཁྱོད་ཅག་ཀྱི་ཚིག་ཡང་བརྫུན་དང་ཟོལ་མཆིས་
(135) པས། སླར་གཤེགས་ཤིག༎ ༎ ཕོ་ཉས་ལན་བཏབ་པ༎ བདག་ཅག་ངན་པ་ལ་རྫུན་དང་ཟོལ་མ་མཆིས། ལྕགས་ཀྱི་མྱི་
(136) རྟ་ཞུབ་ལྕགས་ཀྱི་ཁྲ་བཀྱེ་བ་གློག་ལྟར་མྱུར་བ་དང་ཡང་མཇལ་ཏེ། ལྕགས་ཀྱི་ཐུར་མ་ལ། ལྕགས་ཀྱི་རི་བོང་གཏུར་ནས་བསྲེག་
(137) ཤ་བགྱིད་པ་དང་ཡང་མཇལ། མཛོ་མོ་དཀར་མོ་ཞིག་བཤས་ཏེ། མཞུག་མ་མ་བཅད་པ་དང་ཡང་མཇལ་ནས། དེ་ཀུན་ལ་ཡང་
(138) ཕྱྭའི་བཀའ་རྟགས་དང་སྐྱེས་རངས་ཕུལ་ཏེ། རྟ། རྒལ་ནས་མཆིས་ན། ད་སྐུ་བླ་མྱི་མཐུར་མྱི་གཡོ་བའི་ལྷ་ཡོན་ཙམ་འབུལ་དུ་
(139) མཆིས་ན། ལྷ་ཞལ་ཙམ་མཐོ་ཞིང་ཕྱག་ཆུད་པ་ཙམ་དུ་ཅི་གནང༎ ༎ དམུ་རྗེས་བཀའ་སྩལ་པའ་པ+འ་
(140) འོ་ན་ཕྱྭ་འི་ཕོ་ཉ་ངེད་ཀྱི་སྐུ་བླ་ལ་མཆོད་གསོལ་དུ་འོངས་ན། མཆོད་པའི་རྐྱེན་ཅི་ཡོད། འཇང་སྨྱུག་མཆོད་
(141) ལ། ཐང་ཀར་ཡུག་གྱིས་བསྒྲོན་བ་ལྷ་མདའ་ཡོད་དམ་མྱེད། ལྷ་མདའ་འི་རྐྱེན་རྒྱ་དར་རིས་ཕྲན་ཡུག་ཀྱིས་
(142) བཏགས་པ་ཡོད་དམ་མྱེད། གསེར་ཁ་མ་བླངས་པ་ཡོད་དམ་མྱེད། གཡུ་འི་སླག་ཅེན་ཡོད་དམ་མྱེད། སྔོན་མོ་
(143) འབྲུ་བདུན་ལ་ཁལ་དགུ་ཡོད་དམ་མྱེད། སྔོན་མོ་འདིང་དིང་འབྲས་ཀྱི་ཁུ་ཁལ་དགུ་ཡོད་དམ་མྱེད། མཐུད་གོང་
(144) གོང་མོ་ཙམ་མཆིས་སཾ་མ་མཆིས། མར་གི་སྲེག་ཤ་སྲེག་པ་ཙམ་མཆིས་སམ་མ་མཆིས། ཨོ་མའི་
(145) གདར་བྲེ་ཁ་ཙམ་མཆིས་སམ་མཆིས། ལྷ་ལུག་ངོ་མར་མཆིས་སམ་མཆིས། ལྷ་རྟ་སྙན་ཀར་མཆིས་
(146) སམ་མ་མཆིས། ལྷ་འབྲི་ཟལ་མོ་མཆིས་སམ་མ་མཆིས། ལྷ་གཡག་ཤམ་པོ་མཆིས་སམ་མ་མཆིས།
(147) དམུ་རྗེ་ལ་ཡང་སྐྱེས་རངས་རྫོགས་པར་མཆིས་སམ། དམུ་བློན་ལ་ཡང་སྐྱེས་རངས་རྫོགས་པར་མཆིས་ན།
(148) འདྲོན་པོ་དག་ཀྱང་དགུང་མཐའ་སྐོར་སྐོར་ནི། རྒོད་པོ་མཐའ་ཟགས་ལ། དོག་མཐཱ་མཐའ་ སྐོར་བསྐོར་ནི་མཚལ་
(149) བ་ཐིལ་རྡོལ། མྱི་ནི་ཆད་རྟ་ནི་ངལ་ན་ཡང། ར་མའི་འདབ་ཙམ་དུ་གདབ་དུ་གནང། སྐུ་བླ་ལ་ཡང་ཡོན་འབུལ་
(150) དུ་གནང་ངོ༎ ༎ ཞུ་བ་རྣམ་འག་འགའ་ སྙན་དུ་ཞུས་ཏེ། བཀའ་གཉན་པོས་ལུང་དུ་སྩལ་ཏེ་གནང་
(151) བ། གཏང་རག་སྤྱི་བོ་གཙུག་གྱིས་འཚལ་ཞིང་མཆིས་སོ༎ ༎ ༄༅༎ སྐུ་གཉེན་ཕྱོགས་ཀྱི་
(152) ཞ་སྔ་ནས། མང་ཞམ་ཉིད་ཀྱིས་མཆོད་གསོལ་པ༎ བདག་ཅག་ངན་པ་ལྟ་ཤིག་མཆིས་པ། བུས་བ་ངན་པ་
(153) འགའ'ga['] ཞིག་རྐང་རིངས་ཏེ་སྐྱེས་ན། ཁྱེད་ཀྱི་ཞམ་འབྲིང་འདབ་དུ། རིང་བའི་ནི་སྲབ་མདའ་འཛིན་པ་འམ། ཐུང་བའི་
(154) བའི་ནི་ཡོབ་ཅེན་གི་རྟེན་ཙམ་འམ། མཚན་མོ་ནི་གཡང་མོ་འི་མཐའ་སྐྱོང་བ་ཙམ་དུ་འབུལ་བར་བསཾས་
(155) ཏེ། རྐོ་[---] [རྣམ?]འགའ'ga['] ཙམ་ཞུས་ན། ཡང། རྐོ་ལོང་དུ་མ་བརྩིས་ཏེ། བཀའ་ཆད་ཀྱིས་མ་བཀུམ།
(156) གཤེགས་སུ་གནང་བ་གློ་བ་དགའ༎ དེ་འི་རྗེས་ལ་མྱི་དང་འདྲ་བའི་གདན་ཚབ་འམ། གསོལ་དུ་རུང་བའི་
(157) བཤོས་[སྐྱེམས?]ནི་ཅི་ཡང་མ་འབྱོར་ལགས་ན་ཡང། བྱེའུ་ཚང་དུ་རྒྱལ་གཤེགས་པ་དང་མཚུངས་ཏེ། གདུགས་
(158) ཚོད་མ་ཁོངས་པའི་ཐོག་དུ། གྲང་མོ་ཞལ་བུ་རེ་རེ་ཞིག་སྐུ་ལ་དམྱིགས་ཤིང་མཆིས་ན། ཆུངས་ཀྱིས་
(159) བཀའ་མྱི་འབབ། བཞེས་པ་ཙམ་དུ་ཅི་གནང༎ ༎ བདག་ཅག་ངན་པ་མཆིས་
(160) པ་ཡང་དེང་གི་གདུགས་ལ། འདི་འདྲ་བའི་བཀའ་ལུང་གཉན་པོ་གཡར་དུ་སྩལ་པ་ཡང། གཡར་ཚོད་མ་
(161) མཆིས༎ བདག་ཅག་ཀྱི་ཡབ་ཁུ་དག་ཀྱང་མ་རྫོགས༎ ཡབ་ཁུ་དག་དང་བཀའ་གྲོས་བགྱིས་ལ་
(162) དེ་ནས་ཁྱེད་ཅག་ལ་བཀའ་ལུང་དག་སྦྱིན་གིས༎ ༎ སྐུ་གཉེན་འཕྲུལ་གི་ཞ་སྔ་ནས།
(163) དེང་གི་གདུགས་ལ་གོར་བུ་འི་ཞབས་ཚེགས་ལ་མ་གཟིགས་ཏེ་གདན་གཤེགས་སུ་གནང་བ་གློ་བ་
(164) དགའ། བདག་ཅག་ངན་པ་ཡང་ལྷ་ཞལ་ཙམ་མཐོང། ལྷ་བཀའ་ཙམ་ཉན་ཅིང་མཆིས་ན། བཀའ་
(165) སྩལ་པ་ཙམ་དུ་ཅི་གནང༎ ༎ དེ་ལགས་ཁྱེད་འོ་སྐོལ་མཆིས་པ་ཡང། ཕུ་ནི་སྟོང་སྡེ།
(166) མདའ་ནི་རྒྱ་སྡེ། རྗེ་གཅིག་གི་འབངས་ལ་ཡུལ་ཅྀག་གི་ནི་མྱི། ས་ཅིག་གི་འབྲས། རི་ཅིག་གི་
(167) རྡོ། ཁྱེད་འོ་སྐོལ་ལ་དབྱར་མྱེད་པས། ཁྱེད་ཀྱིས་ནས་ཀྱང་ཅེའུ་ཡག་དང་ལོག་མེན་དག་ལྟོས། རུང་
(168) ཞིང་ཤིས་པར་གྱུར་ན། བདག་ཅག་[---]བཀའ་གྲོས་དག་བགྱིས[b]gyis ལ། ཁྱེད་ལ་བཀའ་ལུང་དག་སྦྱྀན་གིས།