(1) $ /:/ gna' gnyen mtha' bzhi ['i?] rabs la / / lde 'i gangs [bar?] na / lde za'I gang rag m'a / / skyI 'i la mda' na / skyI za ['i? dro?]
(2) [gtshan?] / / [dags kyI bsen?] mkhar na / dags za 'I gyIm pang ma' / mchIms yul gyI dngul [khung na?] / mchims
(3) [za?] sha chang ma' / / gnyen nI mtha' bzhi / / chab [nI?] lugs gchig / [yos?] nI srang gchig / myI mtha' [---]
(4) [---] mtha' [bzhi?] ni [brag?] / chab mtha' bzhI ni [---] pyib mtha' bzhI ni [---] / gos m[tha'?]
(5) [bzhI?] [n?]i dar / / gnyen mtha' [bzhI?] [nI?]'I rabs dang lugs nI ['dI? lags?] / /
(6) $ / / rgyal pran yul yul na / mkhar bu re re na gnastegnas te / rgyal pran bgyId pa dang / rgyal pran gyI blon po bgyid pa 'I [rabs?]
(7) la / / zhang zhung dar pa 'I rjo bo lig snya shur / blon po khyung po ra sangs rje dang / stong lom ma tse gnyIs / / [myang?]
(8) ro 'i pyed kar na / rje rtsang rje 'i thod kar / blon po su du dang gnang gnyIs / / yul gnubs gyI kling dgu' na
(9) rje gnubs rje 'I sris pa / / blon po rme 'u dang gro gnyis / / yul myang ro 'i sham po na / rje lo ngam byi [brom?]
(10) [cha?]tsha / blon po ngab myi dang 'bre gnyis / yul skyi ro 'i ljang sngon na / rje skyi rje 'I rmang po / blon po she 'u dang [spug?]
(11) gnyis / / yul ngas po 'i khra sum na / rje dgug grI 'i zing po rje / blon po mgar dang mnyan gnyis / /
(12) yul dbye mo yul bzhI na / rje dbye rje 'I mkhar pa / blon po dbo dang rtug gnyis / / yul 'o yul gyi spang
(13) gar na / / rje 'ol rje 'I zin brang tsha / blon po rngo dang dba's gnyis / / yul rngegs yul gyi gru
(14) bzhI na / rje rngegs rje 'I la brang / blon po sas pa dang myang nad gnyis / / yul klum ro 'i ya sum na
(15) rje nam pa 'i bu gseng ti / / blon po myang dang sbrang gnyis / / yul sribs yul gyi ral mo [gong?] /
(16) [rje?] drang rje 'I rnol nam / blon po zhug tshams dang dbrad gnyis / / yul rkong la bre snar na / / rje
(17) rkong rje 'I dkar po / blon po mkhar pa dang pha drug gnyis / / yul myang yul gyI rta gsum [na'?] /
(18) rje myang tsun slang rgyal / / blon po 'o ru dang sprags gnyis / / yul dags kyi gru bzhi na / rje dags
(19) rgyal gyI sprog zin / blon po pha gu dang pog rol gnyis / / yul mchIms yul gyi dgu' shul
(20) na' / rje mchims rje 'I ne 'u / blon po dang dang ding ding gnyis / / yul sum yul gyI ya sum na' / /
(21) rje 'thal ljI rmang ru ti / blon po rlang dang kam gnyIs / / yul 'brog mo snam gsum na' /
(22) rje se re khrI / blon po skyang re gnag / / rgyal pran bcu gnyis na / se re khri dang bcu gsum / blon po
(23) nyI shu rtsa bzhi na / skyang re gnag dang nyi shu rtsa lnga / mkhar bcu gnyis na / dbu lde [dam (/ngam)] pa dang bcu gsum /
(24) yul bcu gnyIs na / byang ka snam brgyad dang bcu gsum / rgyal dgu' sngo bcu / / blon [dgu'?] /
(25) mchims bcu zhes bya ste / / de yan chad ya yogs ni / gdod byin rum gyi nI rkyen zhes bya ste / /
(26) gna' yul yul na rgyal pran dang / blon po 'dI ltar bab ste / / myi mang gI rje / yul che 'i bdag
(27) byed byed pa las / rgyal po btsan ba dang / blon po 'dzangs pa dku' bo che rnams kyis / gchig
(28) gIs gchig brlag ste / 'bangs su bkug na / mtha' ma 'o lde spu rgyal gyI dbu rmog ma thub ste /
(29) mnar nI lha nar gyis mnard / thun nI rje thun gyis bthun te bkug go / /
(30) $ /:/ lha gnam gyI steng nas gshegs pa' / / gnam lhab kyi bla na / / yab lha bdag drug bzhugs pa 'i sras / gcen
(31) gsum gcung gsum na / khrI 'i bdun tshIgs dang bdun / khri 'i bdun tshigs kyI sras / khri nyag khrI btsan po' / /
(32) sa dog la yul yab kyi rje / dog yab kyi char du gshegs s'o / / lha rI gyang dor gshegs na / rI rab lhun po yang
(33) dgu' dud dud / shIng sdong po yang bang thang thang / chab lu ma yang dngo sil sIl / gor pha bong la stsogs pa yang
(34) mnyed khrung khrung gis pyag 'tshal lo / / bod ka g.yag drug gI rjer gshegs so / thog ma sa la gshegs
(35) pa yang / gnam mtha' 'og gI rjer gshegs pas / gnam gyI ni dbus / sa 'I ni dkyil / glIng gi ni snying
(36) po / gangs kyi nI ra ba / chu bo kun kyi ni mgo bo / / rI mtho sa gtsang / yul bzang / myi 'dzangs shing
(37) dpa' du skye / chos bzang du byed / rta mgyogs su 'phel ba 'I gnasugnas su / tshul kyis bdams ste gshegs'o /
(38) rgyal po gzhan dang myI mtshungs pa 'I chos / pyag mnyed khrung khrung gIs 'tshal zhIng / sle ba 'od kyis
(39) len / myI btsun son pa 'I rnams / rje sa 'I gos gyon zhing / skyes pa ched po rnams btsun ba 'i [rnams?]
(40) pa yang de nas byung ba yIn no / / shIng rabs kyI nang na nI thang shIng ring po ring / chu rabs kyi nang na ni
(41) yar cu sngon po che / / yar lha sham po ni gtsug gI lha 'o / /
(42) $ /:/ gnam lhab kyI bla na yab bla bdag drug bzhugs pa pa 'I sras / / gcen gsum gcung gsum na / / khri 'i bdun tshIgs dang bdun / /
(43) khrI 'i bdun tshIgs kyi sras / / lde nyag khri btsan po / sa dog la yul yab kyi rje dog yab kyI char du gshegs nas / / lha sras myi
(44) yul gyI rgyal mdzad cing bzhugs pa las / mngon du thal byung dgung du gshegs pa / / lde nyag khri btsan po dang / gnam mug
(45) mug du bshos pa 'I sras / / mu khri btsan po mugmu khri btsan po dang sa dIng ding du bshos pa 'I sras / / dIng khri btsan po ding khri
(46) btsan po dang / so tham tham du bshos pa 'I sras / so khri btsan po / so khri btsan po 'i sras / de khri btsan po / de khri btsan
(47) po 'i sras / khri spe btsan po / / 'dI yan chad 'dra' ste / sras chIbs ka thub na / yab dgung du gshegs so / / khri spe
(48) btsan po 'I sras / drI gum btsan po / dri gum btsan po 'i sras / / spu de gung rgyal gnam la dri bdun / sa le legs
(49) drug bshos na / spu de gung rgyal grongs na / / grang mo gnam gser brtsig / gser brtsig gI sras / / tho leg
(50) btsan po / / tho leg btsan po 'i sras / sho legs btsan po / sho legs btsan po 'i sras / / go ru legs btsan po
(51) go ru legs btsan po 'i sras / / 'brong zhi legs btsan po / 'brong zhi legs btsan po 'i sras / thi sho leg btsan po' /
(52) thI shog leg gi sras / ^I sho leg btsan po / / ^i sho leg gI sras / zva gnam zIn te / / zva gnam zIn te 'i sras /
(53) lde pru bo gnam gzhung brtsan / gnam gzhung brtsan gyI sras / / lde gol / lde gol / lde gol gyi sras / gnam lde rnol
(54) nam / gnam lde rnol nam gyI sras / bse' rnol po / bse rnol po 'i sras / lde rgyal po / lde rgyal po 'i sras /
(55) rgyal srIn brtsan / rgyal srin brtsan gyI sras / rgyal to re longs brtsan / rgyal to re longs brtsan gyi sras /
(56) khri btsan nam / / khrI brtsan nam gyI sras / khri sgra sbung brtsan / khrI sgra sbung brtsan gyi sras / / khrI thog brtsan
(57) khri thog brtsan dang / ru yong za stong rgyal mtsho mar bshos pa 'I sras / lha tho do snya brtsan / lha tho do
(58) snya brtsan dang / gno' za mang mo rje ji dgos su bshos pa 'I sras / / khrI snya zung brtsan / khrI snya zung
(59) brtsan dang / 'bro' za dung pyang bzher du bshos pa 'I sras / 'bro mnyen lde ru / 'bro' mnyen lde ru dang /
(60) mchims za klu rgyal ngan mo mtshor bshos pa 'I sras / / stag bu snya gzigs / stag bu snya gzigs dang /
(61) 'ol god za stong tsun 'bro gar bshos pa 'I sras / / slon btsan rlung nam / slon btsan rlung nam dang /
(62) tshes pong za 'bring ma thog dgos su bshos pa 'I sras / / srong lde brtsan / srong lde brtsan dang / mong
(63) za khrI mo mnyen ldong steng du bshos pa 'I sras / / gung srong gung rtsan / gung srong gung rtsan dang / khon co mang mo
(64) rje khri skar du bshos pa 'I sras / / mang slon mang rtsan / mang slon mang rtsan dang / 'bro' za khri ma lod
(65) [khrI?] steng du bshos pa 'I sras / / 'dus srong mang po rje / 'dus srong mang po rje dang / mchims za btsan
(66) ma thog / thog steng du bshos pa 'I sras / / khrI lde btsug brtsan / / khri lde gtsug brtsan dang / sna nam za'
(67) mang mo rje bzhI steng du bshos pa 'i sras / khri srong lde brtsan / khri srong lde brtsan dang / tshes pong za rma rgyal
(68) ldong skar du bshos pa 'I sras / mu ne brtsan dang / lde srong brtsan / mu brtsan gdung chad nas / lde srong
(69) brtsan dang / 'bro za lha rgyal mang mo rjer bshos pa 'I sras / khrI gtsug lde brtsan dang / 'u 'I dum brtan