Old Tibetan Documents Online བོད་ཡིག

Text Archives > Pt_1055

Pelliot tibetáin 1055 + [IOL Tib J 744] —The text is divided between two parts.
    This Text All the Texts Find both and  
1. Content : Divination with coins.
2. Note : scroll. The beginning is missing. Recto, 94 lines. Verso, blank. Originally a single document which is divided into two parts: IOL Tib J 744 and Pelliot tibetáin 1055. The text continues from Pelliot tibetáin 1055 to IOL Tib J 744.
3. References :
Choix II (pls. 353-354).
Lalou (1939-1961: II, 46) [P.Translit.], Yamaguchi (1985: 533-534 [P.Trans.], Yamaguchi (1987: 174-175) [P.Trans.], Wang Yao and Chen Jian (1987: 134-148) [I.Translit.,I.Trans.].

Transliteration   (Change the Display Format)

(1) བ་ལ་བཏབ་ན་དོན་མྱི་འགྲུབ༎ དགྲ་པྱ་ལ་
(2) བཏབ་ན་དགྲས་མྱི་ཚུགས༎ འཕོ་སྐྱས་བྱ་
(3) ན་ངན༎ འདྲོན་པོ་ལ་བཏབ་ན་ཉེ་ཞོ་མྱེད་དེ་
(4) རེ་ཤིག་མྱི་འོང༎ མོ་གཞི། ༔་།
(5) ༄༅༎ དོང་ཙེ་བཞྀ་གན་ཏེ་གཞན་བུབ་ན། ཆུ་འི་
(6) ངོ་བྱུང་སྟེ༎ ལུས་ལ་གདོན་མྱེད༎ ཁྱིམ་
(7) པྱ་དང་སྲོག་པྱ་ལ་བཏབ་ན་བཟང༎ སྙིང་ལ་
(8) འཚེར་བ་ཡོད་ཀྱང་ཉེས་པ་མྱི་འབྱུང༎ བྱ་འོ་
(9) ཅོག་གྲུབ༎ གཉེན་བྱ་ན་བུ་ཙ་གཞིན༎ ཁང་
(10) ཁྱིམ་བྱ་ན་ཁ་དྲོ༎ ནད་པ་ལ་བཏབ་ན་སོས་
(11) པའི་ངོ༎ གདོན་པྱ་ལ་བཏབ་ན། དྲྀ་མོ་དང་
(12) ཐབ་རྒོད་ཆེ༎ དོན་གཉེར་ན་གྲུབ༎ དགྲ་པྱ་ལ་
(13) བཏབ་ན། དགྲ་མྱེད༎ བོར་རླག་བྱུང་ན་རྙེད་པའྀ་
(14) ངོ༎ འཕོ་སྐྱས་བྱ་ན་བཟང༎ ནད་པ་ལ་བཏབ་
(15) ན་སོས་པའི་ངོ༎ འདྲོན་པོ་ལ་བཏབ་ན།
(16) མྱུར་དུ་ཕྱིན་ཏེ་མོ་འདི་ཅི་ལ་བཏབ་ཀྱང་བཟང་
(17) རབ་བོ། ༔་།
(18) ༄༅༎ དོང་ཙེ་ལྔ་གན་ཏེ་གཞན་བུབ་ན། གསེར་
(19) གི་ངོ་བྱུང་སྟེ༎ ཁྱིམ་ཕྱ་དང་སྲོག་པྱ་ལ་བཏབ་
(20) ན༎ ནོར་རྫས་ཤིག་ལ་གདོན་ཆེ་སྟེ། བྱ་འོ་ཅོག་
(21) མྱི་གྲུབ༎ སྲོག་པྱ་ལ་བཏབ་ན་ཤི་བའི་ངོ༎ ནད་
(22) པ་ལ་བཏབ་ན༎ མྱུར་དུ་ས་མ་སྤོས་ན་ཤྀ་བའྀ་ངོ་
(23) གསོལ་བ་དང་ཤགས་བཀྱེ་ན་མྱི་གནང་སྟེ་ཕམ་
(24) བའི་ངོ༎ གཉེན་བྱ་ན་ཁྱིམ་ཏབ་ཤི་བའི་ངོ༎
(25) དགྲ་པྱ་ལ་བཏབ་ན། དགྲ་དང་ཕྲད་པའི་ངོ༎ ཞལ་
(26) ཅེས་བཏབ་ན་རེ་ཤིག་མྱི་འབྱང༎ སྲིད་པྱ་ལ་
(27) བཏབ་ན། སྲིད་མྱེད་པའི་ངོ༎ འདྲོན་པོ་ལ་བཏབ་
(28) ན། ཉེ་ཞོ་བྱུང་སྟེ། རེ་ཤིག་མྱི་འོང༎ བོར་རླག་ལ་
(29) བཏབ་ན་མྱི་རྙེད༎ མོ་འདི་ཅི་ལ་བཏབ་ཀྱང་
(30) ངན་རབ་བོ། ༔།
(31) ༄༅༎ དོང་ཙེ་དྲུག་གན་ཏེ་གཞན་བུབ་ན། ས་འི་ངོ་བྱུང་
(32) སྟེ༎ ཁྱིམ་པྱ་དང་སྲོག་པྱ་ལ་བཏབ་ན་བཟང། རབ་
(33) གསོལ་པ་དང་ཤགས་བཀྱེ་ན་གནང་ནས་བདག་རྒྱལ་
(34) བའི་ངོ༎ གཉེན་བྱ་ན་འཕྲོད་དེ་བུ་ཙ་གཞིན༎
(35) ཁང་ཁྱྀམ་བྱ་ན། དབང་ཏང་སྐྱེ་ཕྱུག་བཙན་བའི་ངོ།
(36) དོན་གཉེར་ན་གྲུབ༎ ནད་པ་ལ་བཏབ་ན་སོས།
(37) བོར་རླག་བྱུང་ན་རྙེད་པའི་ངོ༎ འཕོ་སྐྱས་བྱ་ན་
(38) བཟང༎ འདྲོན་པོ་ལ་བཏབ་ན་མྱུར་དུ་ཕྱིན་ཏེ།
(39) མོ་འདི་ཅི་ལ་བཏབ་ཀྱང་བཟང་རབ་བོ། ༔་།
(40) ༄༅༎ དོང་ཙེ་བདུན་གན་ཏེ་གཞན་བུབ་ན། ལྀའི་
(41) ངོ་བྱུང་སྟེ༎ སྲོག་པྱ་དང་ཁྱིམ་པྱ་ལ་བཏབ་ན་
(42) ངན༎ བླ་ནས་གྱོད་རྨས་སཾ་མྱི་རྨས་པ་ལ་བཏབ་ན་
(43) རྨས་པའི་ངོ༎ ནད་པ་ལ་བཏབ་ན་ཆོ་ག་མ་བྱས་
(44) ན་ཤྀ་བའི་ངོ༎ ལམ་རིང་པོར་འགྲོ་འམ་མྱི་འགྲོ་བ་
(45) ལ་བཏབ་ན། འགྲོ་སྟེ་ནེ་ཞོ་འབྱུང་བའི་ངོ༎ དགྲ་
(46) པྱ་ལ་བཏབ་ན། དགྲ་དང་ཕྲད་པའི་ངོ༎ གསོལ་བ་
(47) ལ་བཏབ་ན་མྱི་གནང༎ གདོན་པྱ་ལ་བཏབ་ན། རྩོག་
(48) དང་ཐབ་ཆེ་བའི་ངོ༎ གྲོག་པྱ་ལ་བཏབ་ན་གྲོག་མྱེད།
(49) འདྲོན་པོ་ལ་བཏབ་ན། རེ་ཤྀག་མྱི་འོང༎ མོ་འདི་
(50) ཅི་ལ་བཏབ་ཀྱང་ངན་རབ་བོ། ༔་།
(51) ༄༅༎ དོང་ཙེ་བརྒྱད་གན་ཏེ་གཞན་བུབ་ན༎ ས་དང་
(52) ཆུ་འི་ངོ་བྱུང་སྟེ། ལུས་ཀི་སྲོག་པྱ་ལ་བཏབ་ན་བཟང་
(53) རབ༎ ཁྱིམ་པྱ་དང་སྲིད་པྱ་ལ་བཏབ་ན། སྙྀང་ལ་འཚེར་+ར་
(54) བ་ཡོད་ཀྱང་ཉེས མྱི་འབྱུང་སྟེ་བཟང༎ དགྲ་པྱ་
(55) ལ་བཏབ་ན། དགྲས་མྱི་ཚུགས༎ ངོ་འཕྲལ་དང་ལས་
(56) གསོལ་ན་མྱི་གནང༎ དོན་གཉེར་ན་མྱི་གྲུབ། གཉེན་
(57) བྱ་ན་འབྱོར༎ ནད་པ་ལ་བཏབ་ན་མྱུར་དུ་འབྱང༎
(58) བོར་རླག་བྱུང་ན་རེ་ཤྀག་མྱི་རྙེད་དེ་གཞན་གིས་བྲིན་པའི་ངོ།
(59) འཕོ་སྐྱས་བྱས་ན་ཉེས་པ་མྱི་འབྱུང༎ ཁང་ཁྱིམ་བྱས་
(60) ན་གདོན་མྱི་ལྡང༎ འདྲོན་པོ་ལ་བཏབ་ན་ཉེ་ཞོ་མྱེད་ད་
(61) རེ་ཤིག་མྱི་འོང༎ གྲོག་པྱ་ལ་བཏབ་ན་གྲོག་ཕྱི་དལ༎
(62) གདོན་པྱ་ལ་བཏབ་ན་མྱི་ལྷ་དང་གདོན་ངོ་མཆིས་པའི་ངོ།
(63) ཕར་འགྲོ་འམ་མྱི་འགྲོ་བ་ལ་བཏབ་ན་མྱི་འགྲོ་སྟེ་མོ་
(64) གཞི། ༔།
(65) ༄༅༎ དོང་ཙེ་དགུ་གན་དེ་གཞན་བུབ་ན༎ ཀོང་ཙེ་འི་
(66) ངོ་འབྱུང་སྟེ༎ ཁྱིམ་པྱ་དང་སྲིད་པྱ་ལ་བཏབ་ན།
(67) ཟླ་བ་ཚེས་པ་བཞིན་སྟེ། ཡར་ཡར་སྐྱེ་ཞིང་བཟང་
(68) རབ༎ ནད་པ་ལ་བཏབ་ན་སོས་པའི་ངོ༎ འོང་ངམ་
(69) མྱི་འོང་བ་ལ་བཏབ་ན། ཉེ་ཞོ་མྱེད་དེ་མྱུར་དུ་འོང་
(70) བའི་ངོ༎ གྲོག་པྱ་ལ་བཏབ་ན། གྲོག་ཆེད་པོ་ཐོབ་
(71) པའྀ་ངོ༎ གསོལ་བ་དང་ཤགས་འགྱེད་ན། བདག་
(72) རྒྱལ་ནས་སྙིང་དགའ་བའི་ངོ༎ སྲིད་པྱ་ལ་བཏབ་
(73) ན་བཟང༎ ནད་པ་ལ་བཏབ་ན་མྱུར་དུ་སོས་པའི་
(74) ངོ༎ སྲོག་པྱ་ལ་བཏབ་ན་བཟང། འདྲོན་པོ་ལམ་
(75) དུ་ཞུགས་ཏེ་འགྲོ་བ་ལ་བཏབ་ན༎ བླ་མས་བསྐྱབས་
(76) མཛད་པའི་ངོ༎ མོ་འདི་ཅི་ལ་བཏབ་ཀྱང་བཟང་རབ་བོ་
(77) ༔། ༄༅། ༔། དོང་ཙེ་བཅུ་གན་ཏེ་གཞང་བུབ་
(78) ན༎ མྱེ་དང་སའི་ངོ་བྱུང་སྟེ༎ ལུས་ལ་ནད་མྱེད།
(79) སྲོག་པྱ་ལ་བཏབ་ན་བཟང། དོན་གཉེར་ན་དོན་གྲུབ།
(80) ངོ་འཕྲལ་དང་ལས་གསོལ་ན་གནང༎ ཁང་
(81) ཁྱིམ་དང་གཉེན་བྱེད་ན་བཀྲ་ཤིས༎ ནད་པ་ལ་
(82) བཏབ་ན། རྩྀ་སྨན་བྱ་མྱི་དགོས་པར་སོས༎
(83) ཞལ་ཅེས་བཏབ་ན་མྱུར་དུ་འབྱང༎ བོར་རླག་བྱུང་
(84) ན་རྙེད་དཀའ༎ འཕོ་སྐྱས བྱས ན་ཉེ་ཞོ་མྱི་འབྱུང།
(85) འདྲོན་པོ་ལ་བཏབ་ན་རེ་ཤིག་མྱི་འོང་སྟེ་མོ་
(86) གཞི། ༔། ༔། ༄༅༎ དོང་ཙེ་བཅུ་གཅིག་
(87) གན་ཏེ་གཞན་བུབ་ན༎ ཀི་ཝང་གི་ངོ་བྱུང་སྟེ་
(88) བླ་ནས་གྱོད་རྨས་སཾ་མྱི་རྨས་པ་ལ་བཏབ་ན།
(89) རྨས་པའི་ངོ༎ ཁྱིམ་པྱ་དང་སྲོག་པྱ་ལ་བཏབ་
(90) ན། གདོན་ཕུགས་སུ་ཞུགས་ཏེ་བྱ་དགུར་མྱྀ་རུང་
(91) གདོན་པྱ་ལ་བཏབ་ན། རྒྱལ་བྱིན་དང་ཐེའུ་རང་ཆེ་
(92) བའི་ངོ༎ ནད་པ་ལ་བཏབ་ན་ཤྀ་བའི་ངོ༎ ཤགས་
(93) བཀྱེ་ན་ཕམ་བའི་ངོ༎ འོང་ངམ་མྱི་འོང་
(94) བ་ལ་བཏབ་ན་མྱི་འོང༎ གྲོག་པྱ་ལ་བཏབ་ན་
';